Toqutsisoqarsimasinnaaneranik suliami ujaasineq aallarteqqinneqalerpoq: Qimmilerlutik tassaniissapput
Tallimanngornermi sapaatip akunneranik sivisussuseqartumik politiit qimmilerlutik Qaqortumiissapput. Angutip politiinut imminut nalunaarutigaluni toqutsisimalluni nassuerutiginninneranik suliap aallarteqqinneqarneranut atatillugu tamanna pissaaq.
Politiinit oqaaseqartitsinikkut nutarterneqarpoq: Pinerluffigineqarsimasup kinaasinnaaneranik nutaarsiassaqanngilaq.
Februaarimi angut Qaqortumi politeeqarfimmut saaffiginnippoq, toqutsisimallunilu nassuerutiginnilluni. Angut taamanili tigummineqarpoq, politiillu suliamik misissuinertik aallartippaat.
Nassuerutiginninneq arnap 35-inik ukiullip Qaqortumeersup, novembarimi 2021-mi tammartup takoqqinneqaqqissimanngitsullu ujaarineqarneranut attuumassuteqarsinnaanersoq misissorneqartoq, politiit siornatigut ilisimatitsinikuupput.
Angutip nassuerutiginninneranut atatillugu politiit februaarimi Qaqortumi Vatikanbakkenimiipput, kisianni politiit oqarnerat naapertorlugu sila pissutigalugu misissueqqissaarnissamut ajornartitsisimavoq.
Maanna aputaarummat nunalu qeriunnaarmat, politiit tassani misissuinerminnik aallartitseqqinniarput, ilaatigut qimmilerlutik tassaniissapput, politikommissær Søren A. Hansen, Qaqortumi politiit immikkoortoqarfiani aqutsisoq tusagassiuutinut nalunaarummi taama oqaluttuarpoq:
Kiannerulernerani misissueqqittoqarsinnaalersoq
- Silap kiannerulernerani tassani misissuinerput nangissinnaanngorparput. Taamaammat piffissami aggersumi qimmilerluta Vatikanbakkenimiissaagut, illoqarfimmilu sumiiffinnut allanut qimmit isaannarmik takusinnaanngisatsinnik naamasaqassanersut takuniarlugu, Søren A. Hansen oqarpoq, nangillunilu:
- Sumik ujaasinerluta oqaatigisinnaanngilara – taamaallaat takussutissanik pisariaqartunik tamanik, qimmit naamasinnaasaannik soqutiginnilluta oqaatigisinnaavara.
Politiit suli siammasissumik misissuisut, taamaattumillu suliami kina pinerluffigineqarsimanersoq oqaatigineqarsinnaanngitsoq, Søren A. Hansen Sermitsiaq.AG-mut ilisimatitsivoq:
Pinerliffigineqartoq pillugu nutaarsiassaqanngitsoq
- Suliami paasissutissat timitaqartut misissornissaat periarfissaasimanngimmat, suliaq siammasissumik suli misissuiffigaarput. Taamaattumik pinerluffigineqarsimasinnaasup kinaanera pillugu nutaarsiassaqanngilaq, taanna oqarpoq.
Aallaqqaammut sumiiffinni aalajangersimasuni assersuisoqarnavianngitsoq, politiit tusagassiuutinut nalunaarummi allappaat, Qaqortumilu innuttaasut nalinginnaasumik allaanerusumik iliuuseqartariaqannginnerarpaat.
- Taamaakkaluartoq politiit piffissami sumiiffinni ujaasiffigisaminni sulinerminni eqqissisimatinneqarnissaminnik qinnuiginnipput, nalunaarummi taama allaqqasoqarpoq.