Toqutsisoqarneranik suliaq: Pinerluuteqartoq annertuumik sumiginnarneqarlunilu atornerluiffiusumiissimasoq
Angut illuusaminik siorna 25. april Tasiilami toqutsisimanerminik nassuerutiginnittoq pillugu paasissutissanik nutaanik sisamanngornermi saqqummertoqarpoq.
Sisamanngornermi ullaap tungaani Eqqartuussisoqarfik Sermersuumi siorna upernaakkut peqqarniitsumik toqutsisoqarneranik suliami ullup aappassaani eqqartuussineq ingerlanneqarpoq.
26. april 2022-mi unnuakkut inuusuttut pingasut illoqarfimmi najugaqarfimmi toqusup timaanik nassaarput. Toqusup timaa ajorluinnarpoq, ilaatigut niaqua peerneqarsimalluni.
Ullaaralaakkut angut tigusarineqarlunilu toqutsisimasutut pasineqarpoq, angullu taanna suliami eqqartuunneqarpoq. Angut aammattaaq timimut iliuusissaanngitsumik iliuuseqarsimasutut unnerluutigineqarpoq.
Angut eqqartuussisoqarneranut atatillugu Kalaallit Nunaannut angallanneqarpoq, tigusarineqarnermi kinguninnguanit Danmarkimi tarnimikkut napparsimasunut katsorsaavimmi katsorsarneqalersimagami.
Qulinik ukioqarluni benziinamik naamaartalertoq
Unnerluutigineqartup toqutsisimanini pingasunngornermi nassuerutigaa. Sisamanngornermi unnerluutigineqartoq pillugu paasissutissat eqqartuussinermi suliarineqarput, tassanilu angut sakkortuumik peroriartornermini atugaqarsimasoq pineqartoq saqqummiunneqarpoq.
Nakorsat nalunaarutaat atuarneqartut naapertorlugit, unnerluutigineqartoq nakuuserfigineqarluni atornerluisunillu angajoqqaaqarluni peroriartorsimavoq. Aammattaaq annertuumik sumiginnagaasimavoq, meeraanerminilu nakuuserfigineqartarsimavoq.
Qulit missaannilli ukioqarluni benziinamik naamaartarnermik atornerluisunngorsimavoq.
Unnerluutigineqartoq 2021-p ingerlanerani ajorseriarsimasoq nalilerneqarpoq, ilaatigut arnaata ernini ernumagalugu oqaatigisimavaa.
Nakorsat nalunaarutaat naapertorlugit unnerluutigineqartoq skizofreneeqarpoq. 2021-mi piviusuunngitsunik isummersortalerlunilu tarnimigut nappaateqalerpoq.
Danmarkimi arlalinnik eqqartuunneqartarsimasoq
Unnerluutigineqartoq ilaatigut Danmarkimi paaqqinnittarfinni 2016-mit 2021-mut inissinneqartarsimasoq, unnerluussisussaatitaasoq ilisimatitsivoq, tassani arlalinnik inuit torersumik eqqissisimasumillu inooqatigiinnerannut pinerluttuliornernut arlalinnik eqqartuunneqarsimavoq.
Unnerluutigineqartoq 2022-mi illoqarfimminut uterpoq.
Nakorsat eqqartuussinermi siunersiortagaasartut angut eqqarsartaatsimigut napparsimasutut nalilersimagaat, unnerluussisussaatitaasut pingasunngornermi eqqartuussisoqarnerani ilisimatitsipput, taannalu piffissaligaanngitsumik katsorsarneqartussanngorlugu pineqaatissinneqassasoq, unnerluussisussaatitaasut piumasaqarput.