Toqutsisimasutut eqqartuussaasimasoq: Ikiorneqanngikkaanni ajorluinnartumik pisoqarsinnaavoq
Meeraaneq sakkortooq inersimasuunermilu atukkat oqimaattut pisumut ajorluinnartumut tunuliaqutaapput, tassani ataataasup qitornani ataatsimik ukiulik sapilivinnermini toquppaa. Ulloq taanna ukiut qulit matuma siorna pisimasoq tikitsinnagu misigisimasaminik uani oqaluttuarpoq.
Meeraanermi misigisat sakkortuut inersimasuunermilu oqimaattunik atugaqarneq, inuup toqutsisunngortarneranut annertuumik sunniuteqaqataasinnaapput. Piffissami kingullermi peqqarniitsumik toqutsinerit amerlanerisa kingorna taama oqaaseqarpoq. Taassuma taama oqaaseqarnerata kingorna, 42-nik ukiulik toqutsisimasutut eqqartuunneqarsimasoq Lars Jørgen Egede oqaluttuarluni saqqummerusulerpoq.
- Toqutsisimaninnut akisussaaffik soorunami uanniippoq, pineqaatissiissutaasorlu naammassereerpara, taanna oqarpoq.
Toqutsisimasutut eqqartuussaasimasup inuunerata aallartinnera oqitsuinnaasimanngilaq.
Lars Jørgen Egede Qaqortumi inunngorlunilu peroriartorpoq. Ataatani ilisarisimanngilaa, meeraanerminilu tamanna pillugu sakkortuumik pimmatigineqartarsimavoq.
- Ataataqarnanga peroriartornermi atukkat oqimaassimapput. Meeqqamma angajoqqaani tamaasa nalussanngikkai pingaartittarsimavara, Lars Jørgen Egede oqaluttuarpoq.
Tarnip pissusianik ilisimasallip Jonna Ketwap, allaaserisami Sermitsiaq.AG-mi saqqummiunnikuusaani, sakkortuumik peroriartorsimagaanni aamma inersimasunngorluni sapilerneq, toqutsinermut nassuiaatissartanut ilaasinnaasartoq oqaatigaa.
42-nik ukiulik Lars Jørgen Egede tassunga assersuutissaasinnaavoq. Taanna ernerminik ataatsimik ukiulimmik 2013-imi toqutsisimanerminut ukiuni arfineq-marlunni pineqaatissinneqarsimavoq, tamatumalu kingorna illoqarfimminut Qaqortumut uteqqinnikuunngilaq.
- Kommunimit ikiorneqarneruneq tapersersorneqarneruneq aamma tarnip pissusianik ilisimasalimmik ikiorneqarneq, ernerma ullumikkut uumanissaanik immaqa isumaqarsimasinnaagaluartoq oqaatigerusuppara, Lars Jørgen Egede, Sermitsiaq.AG-mut oqarpoq.
Inuunermik allannguineq aalajangiisoq
Lars Jørgen Egedep 30-nik ukioqarluni ataatanngortussaalluni paasivaa.
- Eqqaamavara aappara naartulerami atornerluisuunerminut katsorsarneqartoq. Uanga nammineq atornerlueqataasutut ilaqutariittut katsorsarneqarnikuuvunga, taamanikkullu meerartaarnissatsinnut piareersimavugut, taanna oqaluttuarpoq.
Meeraq ataatsimik ukioqalermat Lars Jørgen Egedep kisimeeqatigilerpaa, arnaa Danmarkimut aallarluni uteqqinngimmat. Avissaarneq septembarimi unnukkut ajorluinnartumik kinguneqarpoq, Lars Jørgen Egedep sapilernermini kamalluni ernini toquppaa.
- Ataatatut kisimiittutut angajoqqaatut ikiorserneqarnissannik tapersersorneqarnissannillu kissaateqarninnut oqartussanit akerlilersorneqarneq misigaara. Ullut tamaasa meeqqama pinngitsaaliissummik arsaarinnissutaanissaa ernummatigisalerpara. Tamatuma peqatigisaanik ernerma anaanaqarani peroriartornissaa annerisorujussuuara, uanga ataatannik ilisarisimanninnanga peroriartornera assigalugu, Lars Jørgen Egede oqaluttuarpoq.
Sakkortuumik qisuariartoq
5. septemer 2013-imi angut meeqqaminik ataatsimik ukiulimmik qimitsinikkut ullup siuliani toqutsisimasutut tigummigallarneqartoq, Kalaallit Nunaanni Politiit ilisimatitsipput.
Minutsit taakku Lars Jørgen Egedep kingusinnerusukkut unnerluutigineqaatigalugillu eqqartuussaassutigisani nammineq eqqaamasinnaanngilai, kisianni tunngaviusumik killisiorneqarnermini toqutsisimanerminik nassuerpoq. Qimitsinermimi kingorna ernini napparsimmaviliaassimavaa ikioqqujartorluni, tassanilu politiinit tigusarineqarpoq. Kisianni aaqqiagiinnginnerit toqutsinermik kinguneqaqataatitsisut eqqaamavai:
- Meeqqap anaanaa ullormi tassani aaqqiagiinngissuteqarfigivara, tassani angerlartinniarlugu kissaatiga itigartinneqarpoq. Meeqqama arsaarinnissutigineqarsinnaanera ernumassutigaara, angajoqqaatullu akisussaasutut qinnuteqaatiga eqqartuussiveqarfimmit itigartinneqarpoq. Taava sakkortuumik qisuariarpunga, taanna unnuk meeqqap ataatsimik ukiullip toqunerani pisoq pillugu oqarpoq.
Ikiorsiineruneq pinaveersaartitsisinnaasoq
Lars Jørgen Egede maanna ukiuni marlussunni anigueqqareerpoq, suliffeqarlunilu nalinginnaasumik inuuneqarpoq. Tarnip pissusianik ilisimasallip toqutsisoqartarneranut tunngatillugu oqaaseqarnera aamma tarnikkut ikiorserneqarnissamik amigaateqartoqarnerata ajortumik kinguneqarsinnaaneranik MIO-p oqaatigisaanut, taanna taama qisuariaateqarpoq.
- Ilumoorpoq. Ullumikkut ineriartorneq ernumanartoqartippara, meeqqanut inuusuttunullu ikiorsiisoqartannginnera imigassamik atornerluisunngornermik kinguneqarsinnaavoq, kiisalu ukiukilluni pinerluuteqartalernermut. Sakkortuumik misigisaqarsimanermik katsorsarneqarneq inummut annertuumik iluaqutigineqarsinnaavoq, tamannalu oqartussanit salliutinneqartariaqarpoq, Lars Jørgen Egede oqarpoq.