statistik
Toqutsinerit imatut pinerusarput
Nunatsinni toqutsinerit 1985-miit 2010-p tungaanut ilisimatuussutsikkut kisitsisitigut misissorneqarput. Paasissutissat saqqummersut paatsuugassaanngillat
Nunatsinni toqutsinerni aallaat sakkugineqarnersaavoq toqutsinerillu 84 procentiini imigassaq akuusarpoq. Paasissutissat taakku saqqummerput 1985-miit 2010-mut nunatsinni toqutsinernit kisitsisit ilisimatuussutsikkut misissorneqarneranni peqqinnissaq pillugu isumasioqatigiinnermi NUNAMED-imi Nuummi saqqummiunneqarlutik.
Paasissutissanik saqqummiussisoq tassaavoq Martin Rune Christensen Københavnip Universitetiani Institut for Retsmedicinimeersoq. Misissuinermi siumut pasitsaateriikkat ilaat uppernarsarneqarpoq tassa toqutsinerni amerlasuuni imigassaq akuusarmat.
Takuneqarsinnaavormi toqutsinerit 84 procentiini imigassaq akuusartoq. Toqutaasut ilanngullugit misissorneqarsimapput tassanilu paasineqarpoq toqutaasut 62 procentii imigassartorsimasuusartut.
Kisitsisini aamma takuneqarsinnaavoq toqutsinermi sakkugineqarnerpaaq tassaasoq aallaanninneq toqutsinerit 30 procentiini taama pisoqartarmat. Toqutsinerit 28 procentii tassaapput sakkulerluni persuttaanerup kinguneranik pisut. Toqutsinerit 11 procenti arlaannik ipitsumik sakkulerluni kapisinerup kinguneranik pisartut oqaatigineqarpoq.
Misissorneqarsimasut tassaapput toqutsinerit 100-ut taakkunanilu pinerluttut 119-upput. Taakkunannga 89-it angutaapput arnat 30-ullutik. Toqutsinerni taakkunani toqutaasut 116-upput taakkunannga 63 angutaallutik 53-illu arnaallutik.