Toqutseriarsimasutut tigusarineqarsimasoq
Politiit sapaatip akunnerata naanerani Kangaatsiami pisimasoq misissuiffigaat, angut toqutseriarsimasutut tigusarineqarlunilu unnerluunneqarsimavoq.
Politiit arfininngornermi ullaakkut nalunaaqutaq 9.17, Aasiaat kujataaniittumi Kangaatsiami angerlarsimaffimmi eqqissiviilliortoqarlunilu peqqarniitsumik persuttaasoqartoq pillugit nalunaarfigineqarsimapput.
Arfininngormat unnuakkut nalunaaquttap akunerini arlalinni pisut pisimapput.
Illoqarfimmi kommunefogedi najukkamut apuuteqqaartuusimavoq, apuukkamilu Aasianni politiinut ikiortissarsiorsimalluni, politiit nalunaaquttap akunnerata ataatsip qaangiunnerani tikissimapput. Kalaallit Nunaanni Politiit attaveqartartuat Fabian Uth Nielsen Sermitsiaq.AG-mut ilisimatitsivoq.
Politiit tikikkamik angummik tigusarinnissimapput. Angut pineqartoq sapaatiummat najukkami eqqartuussivimmut sassartinneqarsimavoq, tassani toqutseriarsimasutut unnerluunneqarluni tigummigallagassanngortinneqarsimavoq.
Pisumi minnerpaamik inuk ataaseq persuttarneqarsimavoq, politiillu allanik persuttartittoqarsimanersoq misissuiffigaat, attaveqartartoq ilisimatitsivoq.