Toqutseriarsimanerit marluk eqqartuussivimmi suliarineqalersut
Suliat marluk toqutseriarnermut tunngasut eqqartuussivimmi oktoberip qiteqqunnerani suliarineqassapput. Pisut marluusut Tasiilami ukioq manna aallartisimalernerani pisimapput.
Suliat marluk toqutseriarsimanermut tunngasut Sermersuup eqqartuussivianit oktoberip qiteqqunnerani suliarineqassapput. Pisimasut februarimi 2022-mi pisuupput.
Suliaq siulleq eqqartuussivimmi suliarineqartussaq 13. oktober 2022 suliarineqassaaq. Angut arnamik toqutseriarsimasutut unnerluunneqarluni eqqartuussivimmi sassartinneqassaaq. Pisoq 12. februar 2022 pisimasuuvoq. Angut arnamik sakkortuumik persuttaasimasutut, arnallu inuuneranik navialisitsisimasutut unnerluunneqarluni, toqutseriarsimasutut unnerluunneqarpoq.
Ilisimajunnaarsimasoq timaalu nillorujussuarsimalluni
Unnerluussummi nassuiarneqarpoq angutip arnaq niaquatigut timaatigullu arlaleriarluni persuttarsimagaa. Ilaatigut assani nivaatarlu atorlugit persuttaasimalluni, arnaq allaat niaqqumigut ikilerujussuarsimallugu.
Angutip arnaq ilisimanngitsoq quimi, 10 gradenit issinnerusumi qimassimavaa.
Unnerluussut naapertorlugu arnaq ilisimmarsimavoq nammineerlunilu ikiortissarsiorluni. Ikiorneqarnerani maluginiarneqarsimavoq arnap timaa nillertorujussuanngoreersimasoq.
Angut aamma saniatigut arnamut persuttaasimasutut unnerluunneqarpoq. Arnaq persuttarneqarsimasoq, kingorna toqoriarneqarsimasuunersoq, ilisimatitsissutigineqanngilaq.
Savilersortoq
Angut alla, arnamut allamut toqutseriarsimasutut unnerluunneqarluni aamma eqqartuussaasussanngorpoq. Suliaq Sermersuup Eqqartuussiviata Tasiilami eqqartuussiveqarfiani 17. oktober suliarineqassaaq. Pisoq 19. februar pisimavoq. Angutip arnaq savimmik qungasiata nalaatigut quttoraatigullu kapisimavaa. Kapineqartoq ikiorasuarneqarallartilluni annassimavoq.
Arnaq saassunneqarnermini toqqutigisinnaasaminik ikilerneqarujussuarsimavoq. Ilaatigut iviagimigut kapineqarsimalluni, puammigut kapineqarsimalluni sakissamigullu ikilerneqarsimalluni, unnerluussummi nassuiaatigineqarpoq.
Suliani marluusuni unnerluussisussaatitaasup piumasaraat unnerluunneqartut tamarmik ukiuni sisamani pineqaatissinneqarsimasunut inissiisarfimmiitinneqassasut. Savilersortoqarsimaneranut suliami pinerlineqartumut 10.000 koruuninik akiliisitsisoqassasoq, savimmillu arsaarinnittoqassasoq aamma piumasarineqarpoq.