Skip to main content

Toqutaasimasoq 24-innarnik ukioqartoq

Kalaallit Nunaanni Politiit Ilulissani toqutaallunilu aggorneqarsimasoq maanna kinaassusaanik saqqummiussipput, pineqartorlu tassaavoq Maassannguaq Dalager. Inuit marluk suliamut atatillugu unnerluutigineqarsimapput.

Suliami amiilaarnartumi toqutaasimasoq tassaavoq Maassannguaq Dalager.

Sermitsiaq.AG-p paasissutissaatai naapertorlugit Maassannguaq Dalager 24-innarnik ukioqarpoq.

Toqutaasimasup ilaqutai isumasioreerlugit, toqutaasimasup kinaanera tamanut saqqummiunneqartoq, politiit ilisimatitsissutigaat.

- Misissuineq aamma inuit attaveqaqatigiittarfiisigut tusatsiakkanik ingerlatitseqqiisarneq eqqarsaatigalugit, Kalaallit Nunaanni Politiit toqutaasimasup ilaqutai isumasioriarlugit toqutaasimasup kinaanerata saqqummiunneqarnissaa aalajangersimavaat, politiit tusagassiorfinnut nalunaaruteqarlutik ilisimatitsipput.

Innuttaasunit ikiorneqarusuttut

Suliamut amiilaarnartumut atatillugu politiit innuttaasunit ikiorneqarnissartik piumasareqqippaat.

- Toqutaasimasup 2021-mi oktobarip aappaata tungaanut sumiittarsimanera suli tusarfigerusupparput. Taamaammat innuttaasut tamatumannga paasissutissaateqarsinnaasut tusarfigerusulluinnarpavut, Jan Lambertsen oqarpoq.  

Inuit Maassannguaq Dalagerip toqutaanissami tungaanut sumiittarsimaneranik ilisimasallit, politiinut 70 1448 aqqutigalugu saaffiginnissasut qinnuigineqarput.

Sumiissimava

Kalaallit Nunaanni Politiit Ilulissat ikuallaavianni misissuinertik naammassisimavaat. Misissuisoqarnerali eqqarsaatigalugu inuup timaata ilaanik amerlanerusunik nassaartoqarsimanersoq oqaatigerusunngilaat.

Angut arnarlu toqutsisoqarsimaneranut atatillugu unnerluutigineqarsimapput. Angut novembarip tallimaata tungaanut tigummigallagassanngortinneqarsimavoq, arnarlu iperagaasimalluni, unnerluunneqarnerali suli atuutsinneqarpoq.

- Inunnik marlunnik unnerluussisimanitsinni toqutaasimasullu kinaaneranik paasinnissimanitsinni, suliaq aallaqqaammut nalunartutut isikkoqarsimasoq angusaqarfigilluarsimavarput, Jan Lambertsen Kalaallit Nunaanni Politiit misissuineranni aqutsisuusoq oqarpoq. 

Toqussutaasoq misissuiffigineqartoq

Kalaallit Nunaanni Politiit toqutsisoqarsimaneranut suna pissutaasimanersoq ilisimatitsissutiginngilaat, erseqqissaatigaalli toqussutaasimasoq misissuinermi nassuiaatissarsineqassasoq.

Politiit innuttaasut toqutsisimanermi suliami ikiuussimanerannut qujassuteqarput.

-Kalaallit Nunaanni Politiinit innuttaasut paasissutissarpassuarnik suliamut ikiuutaasimasunut tunniussaqarsimanerannik qujaffigerusuppavut. Tamatumunngalu peqatigitillugu qatserisartut ikuallaavimmi eqqakkanik misissuinermi annertuumik suliaqarsimasut qujaffigeqqikkusuppavut. Taakkoqanngitsuuppat misissuinitsinni angusaqarpallaarsimanavianngikkaluarpugut, Jan Lambertsen oqarpoq.

Maassannguaq Dalahgerip timaata sinneri ilaqutaasunut qaqugu tunniunneqassanersut suli nalorninarpoq.

OQALLIFFIMMUT TIKILLUARIT
  • Oqallinneq malinnaaffigalugulu peqataaffigerusukkukku cookies akuerissavat: ”accepter cookies”.
  • Pingaarutilik! Malittarisassat nutaat: oqallinneq malinnaavigiumallugu peqataaffigiumallugulu https://www.facebook.com/settings/cookie ataani Valgfrie cookies atuuttussanngortinneqassaaq.
  • Oqaaseqaatit allaffissartaat browserinni aamma mattunneqarsinnaavoq. Browserinni Facebookimi oqaaseqaatinut allaffissat atuutilersinnissaannut ilitsersuut uani atuarsinnaavat.
  • Sermitsiaq.AG atuartartutta akornanni isumaqatigiinngittoqaraluarpalluunniit oqalliseriaatsip pitsaasuunissaanik kissaateqarpoq. Oqallinnermut malittarisassanik unioqqutitsineq mattunneqarnermik kinguneqarsinnaavoq.
  • Oqaaseqaatinik sakkortuunik nalunaarutiginninneq pisinnaavoq "rapporter" toorlugu imaluunniit ”markere som spam” toorlugu.

Forsiden lige nu

SENESTE NYHEDER