Toqusoq: Ida Heinrich eqqissivoq

Nunatsinni operamik erinarsornermik ilisimaneqartoq Ida Heinrich sivisuumik kræftimik napparsimareerluni Dronning Ingridip Napparsimmavissuani ullumi tallimanngornermi nalunaaqutaq 11.35 toquvoq.

39-nik ukioqarluni toquvoq. Ida Heinrichip qimatarai meeqqani marluk.

2016-imi katsorsarneqarsinnaanngitsumik kræftimik napparsimalerpoq, kræftilu timaanut siaruaalluni.

Saqqummersitaa kingulleq tassaavoq 'Pigaara Ilunni Assit', ukioq kingulleq saqqummersoq. Kulturikkut Nersornaat Ida Heinrichimut aamma ukioq kingulleq tunniunneqarpoq.

Nappaammik kræftimik eqqugaanini Ida Heinrichip isertuunnikuunngilaa.

Katsorsarneqarsinnaanngitsumik kræftimik nappaateqarluni imaannaanngitsuusoq ukioq kingulleq apersorneqarami ilaatigut oqaatigaa, aamma ilisaaleruni suut tussiutit atorneqassanersut pilersaarusiorneqareersut ilisimatitsissutigalugu.

- Ilisaanissara piareersarujoorpara. Ilaquttakka ilisaanissannut aningaasaajassanngillat. Naasut, kranset nammineq isumagereerusuppakka akilereerlugit. Illerfik Illerfissarsiutileqatigiit isumagissavaat. Erinarsortussat marluk qulakkeereerpakka, tussiutit suut atorneqassanersut aalajangereerpakka. Allaat nunamut ilineqareeruma najuuttut erinarsugassaat aalajangereerpara, tassalu: Seqinersuaq inuulluarina.Meeraallungali nuannarisara. Maanna eqqarsaatigaara illerfiup iluani suut toqunngasigissanerlugit. Tassami kissaatigaara toqoreeruma meeqqama aamma isigisaat kusanassasoq, illerfimmilu aamma meeqqama sanaavinik nassataqassuunga. Panima akisiliaa akiserissavara, ernermalu juullimut pinnersaasiaa tigummissavara, Ida Heinrich Igloo Magazine-mut ukioq kingulleq februaarip 22-ani oqarpoq.

Ida Heinrichip oqariartuutai ukuupput:

• Nuannaarluta inuussuugut, aliasuinnaraluarutta nukillaassagatta.
• Pisinnaatilluta soqutigisagut aallutsigit.
• Asanninneq tamanit qitiuvoq. Kinannguugaluarpat kinarsuugaluarpat assigiimmik pisigit. Inuit isulersoqinagit. Inoqativut ingunnagit, tamattami nunamiippuugut suliassaqarluta.
• Qiimaneq, kissalaarneq, ataatsimuualaarneq atortigit. Imminut pakkusimaarneq. Qanilaassuseq, asanninneq. Inuit paasisinnaagallartillugit asanerartigit.
• Meerannguit tassaapput asanninnermik ilinniartitsisut pingaarnerpaat. Uffa nammineq tamanna sianiginngikkaat.
• Qianeq soorlu tassa illarneq. Sunniutai assigiipput.

Nutaarsiassat

Tasiilami anorersuarnissaanik aarlerisaarut

DMI Tasiilami Kategori 2-mik sakkortussuseqartumik anorersuarnissaanik aarlerisaarivoq, 6. marsi 2024 nal. 09.00-imiit 7. marsi 2024 nal. 01.00-imut atuuttussamik. Anorersuaq sekundimut 25...

Snow Fest-imi iluatsilluartumi nutaaliorsinnaaneq nuannaarutigineqarpoq

Aputit, nipilersortut ataatsimoornerillu nuannersut sammereerlugit ukioq manna Snow Fest sapaatip akunnerata naanerani naammassineqarpoq. Pisortatigoortumik ajugaasup...