Toqusoqarsimaneranut atatillugu takunnissimasinnaasunik politiit ujaasipput
Aasianni niviarsiaraq aqqanilinnik ukiulik toqungasoq nassaarineqarpoq, politiinillu paasiniarneqarluni. Suliami takunnissimasinnaasunik politiit maanna ujaasipput.
Kalaallit Nunaata Politiivi tallimanngornermi unnuap qeqqarluinnalersoq kalerrinneqarput niviarsiaraq piffissaq eqqorlugu angerlarsimanngimmat maqaasineqartoq, namminnerlu kajumissutsiminnik innuttaasut ujaasisut. Politiit nalunaaqutaq 01.23 kalerrinneqarput inuk toqungasoq KJ Greenland Aasiaat aamma aqquserngup Wille Brandtsvejip akornanni nassaarineqarsimasoq.
Politiit takunnissimasinnaasunik ujaasipput, toqusullu ilisarnaatigisinnaasai uani ataani saqqummiukkumallugit:
- Toqungasoq nassaarineqartoq tassaavoq Niina Natuk Filemonsen, 11-nik ukiulik, 150 cm missaanni angitigisoq, saluttoq, nutsani qilerteqartilerlugit qilersimavai, RAL-imik ilisarnaatilimmi, qasertumik tasseqarpoq, ukiorsiummik aappaluttumik Canada Goosemik kavaajaqarluni, tungujortunik taartunik qarlippaaqarluni qernertunillu kamippaqarluni. Kingullermik takuneqarpoq najukkaminiit Pujooriarfimmiit nal. 20.00 missaani animmat, Kalaallit Nunaata Politiivi tusagassiorfinnut ilisimatitsipput.
Kalaallit Nunaata Politiivisa itigartivissinnaanngilaat suliami pinerluttoqarsimasinnaanera.
Takunnissimasunik ujaasipput
- Aasianni innuttaasut Pujooriarfimmiissimasut imaluunniit Wille Brandtsvejimiissimasut ippassaq unnukkut, artlaatigulluunniit suliamut tunngassuteqaratarsinnaasunik paasissutissaateqartut, politiinut saaffiginnequneqarput uunga sianerlutik tlf. 701424 - nal. 16.00 kingorna tlf. 701448.
Politiit innuttaasunut kaammattuipput toqusoqarneranut tunngasumik paasissutissaateqarunik takunnissimagunilluunniit, isumaqaraluarunilluunniit suliamut attuumassuteqanngitsoq, saaffiginneqqullugit.
Ilulissaniit, Sisimiuniit Nuummiillu politiit suliami ikiuuttussat ullumi aqagulu tikissapput. Danmarkimiit toqusoqarsimatillugu misissuisartut marluk marlunngorpat aamma tikissapput, Kalaallit Nunaata Politiivi paasiniaaneranni ikiuutissallutik.