»Toqusoorutiginnginnissaannik qinuinnartariaqarsimavugut«

Erniartortut qanoq ingerlasarpat? Politikeri anaanat napparsimmavissuarmut angalanerit sivisuut pissutigalugit meerartaaqqikkusuttannginnerannik oqaluttuarpoq. Alla ataataasup nuliani Nuummut angalaqatigigaangamiuk aningaasaqarnikkut artukkerneqartarsimaneranik nassuiaateqarpoq.

Demokraatinit Anna Wangenheim

»Toqusoorutiginnginnissaannik qinuinnartariaqarsimavugut«

Erniartortut qanoq ingerlasarpat? Politikeri anaanat napparsimmavissuarmut angalanerit sivisuut pissutigalugit meerartaaqqikkusuttannginnerannik oqaluttuarpoq. Alla ataataasup nuliani Nuummut angalaqatigigaangamiuk aningaasaqarnikkut artukkerneqartarsimaneranik nassuiaateqarpoq.

Politikerit Inatsisartuni oqallinnermut peqataagaangamik inuttut namminneq misilittakkaminnik ilanngussisarnerat qaqutigoortuuvoq.

Qanittukkulli qinikkat peqqinnissaqarfik pillugu misigisimasaminnik saqqummiussiniarlutik tulleriiaatiinnangajapput. Eqqaamasat qaffakaapput. Demokraatineersup Anna Wangenheimip oqaaseqartutut saqqummiussamini oqaluttuaraa, peqqissaasutut isumannaallisaateqarnani pissutsinut ilungersunartorujussuarnut peqataatitaasarsimanini oqaluttuaraa, aviisi AG allappoq.

- Uanga peqqissaasutut peqqissaavimmi sulininni aqqusaarsimavara, piginnaasanik naleqquttunik peqarnata tassanngaannaq pilaasuni peqataasariaqarsimanera naak piumasaqaataagaluartoq peqqissaasumik sinitsitsisartoqarnissamik, pilaasartumik, aaviisartumik il.il. peqarnissaa, aammalu pilatsilluni naartuersinnermik ajortumik kinguneqangajattuni, arnat aanaartorujussuanngortut, silalu peqqutaalluni nunap immikkoortuani napparsimavimmut pinasuartumik ingerlanneqarsinnaanatik, allamillu periarfissaqarata qinuinnartariaqarluta arnat toqusoorutiginnginnissaannik, nassuiaavoq.

- Qujanartumillu arnat annapput, naak aanaarujussuarnertik toqqutigisimasinnaagaluarlugu.

Anna Wangenheimip pisimasut eqqaavai, naartusut taakkualu peqqinnissaqarfimmi atugassarisartagaat pillugit Inatsisartuni sapaatip-akunnerani kingullermi oqallinnermut atatillugu. Nammineq meeqqanut pingasunut anaanaavoq, angajulliliaalu Narsami ukiut 17-it matuma siorna inunngorsimavoq.

- Sulisup misilittagartuup ernisussiorpaanga. Ajunngitsumik ingerlavoq, aammali ajortoqariaannaasimagaluarpoq; uannut meeqqannullumi. Erninermi ajortoqariataarnissaa siumut naatsorsuutigineqarsinnaanngimmat. Tamanna uanga misigaara, soorlu aamma arnarpassuit ernisut allat, uppernarsarsinnaagaat, tullii meeqqat marluk allarluinnarnik piginnaasalinnik atugassarititaasunilu allarluinnarni inunngorput. Tassani paasivara qanoq pingaaruteqartigisoq sukkasuumik qisuariarnissaq pisariaqartunillu piginnaasaqarnissaq, pinartoqarnerani tuaviortumik suligasuarsinnaasunik, Anna Wangenheim itisiliivoq.

Allaaserineqartoq aviisimi AG-mi, sapaatip akunnerani matumani saqqummersumi, tamakkiisumik atuarneqarsinnaavoq. Aviisi uani pisiariuk:

Powered by Labrador CMS