Toqungasup timaata ilaa inuusaasorineqartoq
Ilulissani politiit suli ulappupput. Inummik tammaasaqartunik ilisimannittunik ujaasisoqarpoq, toqungasullu timaata ilaanik nassaarneq suli misissorneqarluni.
Toqungasup timaata ilaanik nassaarneq ulluinnarsiutiginngilarput, viceinspektøri Gideon Quist malunnartumik suliaq pillugu sunnerteqqasoq taama Sermitsiaq.AG-imut oqarpoq. Taanna tusagassiuutinut nalunaaruteqarniarluni Nuup politeeqarfiani tusagassiortunik katersortitsivoq.
Ilulissani ikuallaaviup eqqaani amiilaarnarluinnartumik nassaarneq tusagassiortunik katersortitsineq imaqarpoq.
Sermitsiaq.AG-ip allaaserisaanit allamik nutaarsiassaqanngilaq, kisianni toqungasup timaata ilaa arnaanersorluunniit angutaanersorluunniit suli politiit paasinnginngikkaat, politiinspektørip paasissutissiissutigaa.
Meeraanngitsorlu uppernarsarneqarsinnaavoq.
Sulisumit nassaarineqartoq
Ikuallaavimmi toqungasup timaata ilaa ikuallaavimmi sulisumiit nassaarineqartoq, politiinspektørip aamma oqaluttuaraa. Sulisup siullermik inuusat pisiniarfinni atisanik takutitsisartuusorisimagaluarpaa.
Amiilaarnarluinnartumillu nassaartoqarnerasigut politiit misissuinertik annertuumik aallartippaat.
Ilulissaniittunik arlalinnik Sermitsiaq.AG attaveqarpoq pisorlu annertuumik soqutigineqarpoq.
Toqutsisoqarsimaneratut misissorneqarpoq
Suliaq toqutsisoqarsimaneratut misissorneqarpoq, taamatut paasisaqartoqarsimatillugu soqutiginninneq annertoorujussuusarpoq. Ingammik amiilaarnarluinnartumik pisoqarsimatillugu.
Politiit innuttaasuniit suli suliaq pillugu ikiorneqarnissaminnik amigaateqarput. Tusagassiuutinullu qanimut suleqateqarniarlutik aalajangerput pisoq amiilaarnarmat.