Toqukkut qimaguttoq: Uffe Nunatsinnut sunniuteqarluarpoq
Danmarkip nunanut allanut ministererisimasaa Venstremilu siulittaasuusimasoq Uffe Ellemann-Jensen sivisuumik napparsimareerluni toqukkut qimaguppoq.
Uffe Ellemann-Jensen 80-nik ukioqarluni sapaatiummat toqukkut qimaguppoq. Kalaallit Nunaannut politikeriunermini sunniuteqarluarpoq, nunanut allanut ministeriunermini 1992-ip tungaanut ukiuni aqqanilinni ministeriulluni.
- Ilaatigut Jonathan Motzfeldt kalaallillu politikerii allat peqatigalugit EF-iusimasumit aninerup pissutigisaanik aalisarnermut isumaqatiginninniaqataanikuuvoq, politikkikkut oqaaseqartartoq AG-milu pisortaaneq Christian Schultz-Lorentzen oqarpoq.
Isumaqatigiissutsialak
- Naak naatsorsuutigineqarsimanngikkaluartoq pitsaasumik isumaqatigiissusiortoqarpoq, Nunatta aningaasaqarneranut ukiorpassuarni sunniuteqarluni. Taamatut isumaqatigiissusiornera ajornaatsuinnaanngilaq. Uffe Ellemann-Jensen apersorlugu ilisimatippaanga, EF-imi isumaqatiginninniarneq ingerlalluassanngippat isumaqatiginninniarfimmit anissasut. Taamatummi isumaqatiginninniartoqartariaqarsimavoq, iluatsilluarporlu. EF-ip isumaqatiginninniartitaata tyskip isumaqatigiissut atsiorpaa. Uffe Ellemann-Jensenip isumaqatiginninniaqatini naammagivallaarnagu ima oqaasertalerpaa: ambassadørinngornavianngilaq. Naluara oqaluttuaa qanoq ilumoortiginersoq, naliliinerali inissaminiikkunarpoq, Christian Schultz-Lorentzen oqaluttuarpoq.
Uffe Ellemann-Jensen Royal Greenlandimi ukiorpassuarni siulersuisunut siulittaasuuvoq. 2002-mili Knud Heinesen aamma Niels Wilhjelm siulersuisuni ilaasortaajunnaarsinneqarput, tupaallaataaqisumik.
Kræftimik nappaateqartoq
Uffe Ellemann-Jensenip Naalagaaffeqatigiinneq soqutigisaraa, illersornissamut tunngatillugu Kalaallit Nunaannut soqutigisaqartuulluni.
Kristeligt Dagbladimit apersorneqartilluni ukioq kingulleq oqarpoq kræfteqqilersimalluni.
Rigshospitalimi ataasinngormat innartinneqarpoq, erneratalu Venstremi siulittaasuusup Jakob Ellemann-Jensenip ataatani ilaginiarlugu Bornholmimi politikerit ataatsimuualaarnerat qimappaa.
Jakob Ellemann-Jensen Folketingimi tusagassiortutut atorfeqarnikuuvoq, 1977-imit politikkikkut suliaqalerluni.
Poul Schlüterip (K) ataani nunanut allanut ministeritut toqqarneqarpoq 1982-imi, ukiullu marluk qaangiunneranni Venstremi siulittaasunngorluni.
Nuliani Alice, meeraat sisamat Claus, Helene, Karen aamma Jakob erngutaalu qulit qimatarai.