Topas: Nunanit allanit takornariaqarnissaa ilimananngilaq
Kalaallit Nunaata ukioq manna nunanit allanit takornariartoqarnissaa naatsorsuutigissanngilaa, taamatut oqarpoq takornariartitsinermik suliffiit annersaasa ilaanni Topas Explorer Groupimi pisortaaneq Jørgen Sølvsten Nielsen.
Nunamut tikissinnaanermut killilersuinerit sakkortuut aamma qaqugu killilersuutit sakkukukillineqarsinnaanerat pillugu nalorninerup kingunerannik ukioq manna nunanit allanit Kalaallit Nunaannut takornariaqarnavianngitsoq, Jørgen Sølvsten Nielsen isumaqarpoq.
Topas Travel Ilulissani, Nuummi Kujataanilu takornariartitsisartuuvoq Kalaallillu Nunaanni takornariartitsinermik inuussutissarsiuteqartut annersaasa ilaanniilluni.
- Pitsaassagaluarpoq oqartussat ammaanissamut pilersaarummik saqqummiusisinnaappata, soorunami corona aqukkuminaassissangaluarpat piumasaqaatitalimmik, Topasimi pisortaq oqarpoq.
- Pilersaaruteqartuuppat siunnerfissaqassangaluarpugut, taamalu ukiamut nunanit allaniit Kalaallit Nunaannut takornariarusussinnaasunik immaqa qulakkeerinnissinnaalluta, taanna nassuiaavoq.
Qulakkeerinninngitsoq
Jørgen Sølvsten Nielsenip oqaatigaa, nunatsinni nakorsaanerup oqaatigisimagaa, Kalaallit Nunaanni innuttaasut tamarmik juunip 21-ani inuiattut ullorsiortinnata coronamut akiuussutissalerneqareersimassasut.
- Tamannali Kalaallit Nunaata killilersuutitaqanngitsumik ammaqqinneqarnissaanut qulakkeerinnittuunngilaq, taanna oqarpoq.
Taassuma oqaatigaa, Topas aqqutigalugu Kalaallit Nunaannut takornariartinneqartartut affangajai nunanit allaneersuusartut.
- Ukioq manna danskiinnaanerusut Kalaallit Nunaannut takornariartissavavut, pisortaq coronap ajorseriarneratigut Kalaallit Nunaannut tikissinnaaneq ajornarsitissagaluarpagu, bilitsisiarisimasanik utertitsinissamut piumasaqaatinik sakkukilliliisariaqarsimanerminnik ilisimatitsissuteqartoq oqarpoq.
Angalatitseqatigiiffiup Topasip Kalaallit Nunaat takornariarfissatut dankit aviisii aqqutigalugit qammatit kingulliit ingerlaneranni nittarsaattarsimavaa.
Illuaqqat suliniutigineqarnerat ingerlaannartoq
Taassuma upperilluinnarpaaa, corona aqunneqarsinnaalerpat Kalaallit Nunaata takornariarfissatut siunissaqarluarnera. Ukioq mannali takornariaqarnavianngitsoq isumaqarluni, angalatitseqatigiiffiup taamaammat Kalaallit Nunaanni suliassani annikillisangaatsiarsimavai.
Kapisilinni Nuup kangerluaniittumi illuaqqat atorlugit takornariartitsisarnissamik suliniut, ingerlatseqatigiiffiup Air Greenlandillu avillugit pigisaat, suli aallartisarfimminiippoq, coronalu suli tuniluukkaluartoq ingerlatiinnarneqarluni, Jørgen Sølvsten Nielsen ilisimatitsivoq.