Tonny Fisker: AWG naggammik peqataaffigisussaagaluarpara
32-nik ukiulik Tonny Fisker arfineq pingasoriarluni Arctic Winter Games-imi peqataanikuuvoq. Peqataasarnermini arlaleriarluni ujaminnattarpoq. Aalajangersimagaluarpoq tassa naggammik AWG-eqataaniarluni, coronavirusertoqarnerali pissutaalluni AWG taamaatiinnarneqarroq
Tonny Fisker Arctic Winter Gamesimi arfineq pingasoriarluni peqataaqataareerpoq, peqataanermini 26-eriarluni ujaminnalluni.
2002-mi siullermeerluni peqataavoq, sulorarnermi unammeqataalluni. 2004-mi inuit pinnguaataanni AWG-eqataavoq, 2006-mi sulorarnermi peqataaqqilluni, 2008-mit inuit pinnguaataanni unamminerit 2018 tikillugu peqataaffigalugit.
Arctic Winter Gamesimi ukioq manna ingerlanneqartussami naggammik peqataaniarluni aalajangernikuuvoq, tamannali peqataaffiginngitsoorpaa coronavirusertoqarnera pissutaalluni pisussaagaluaq taamaatiinnarneqarmat. Ilaquttani ilaginerulerniarlugit Arctic Winter Gamesini peqataasarunnaarniarluni aalajangerpaa. Nuliaqarpoq marlunnillu meeraqarlutik.
- Piffissarusujussuaq sungiusarnermut atortarpara, 2002-miilli taamatut ingerlanikuullunga. Aamma seeqqora ippigisalernikuuara, 40-nik ukioqaleruma suli pisulluarsinnaarusuppunga. Kisianni ilaquttakka salliutinnerorusukkakkit Arctic Winter Gamesinut peqataasarunnaarniarlunga aalajangerpara, oqaluttuarpoq.
- Taava siunissami Arctic Winter Gamesimi peqataaqqissanngilit?
- Tassami aallannginnitsinni aalajangiusimasimavara tassa naggammik peqataaniarlunga. Taamaattoq misigiuaannassaanga naggataarsimananga, Tonny Fisker, Air Greenlandimi timmisartortartutut atorfeqartoq, oqarpoq.
Piareersimalluartoq
Arctic Winter Games Whitehorsemi Yukonimiittumi ukioq manna ingerlanneqartussaagaluaq taamaatiinnarneqarnera isumaqatigaa.
- Tusaqqaarakku taamaatiinnarneqartoq qisuariaatiga siulleq tassaavoq 'når, øv'. Taamaatiinnarneqarnera siullermik annertunerusumik eqqarsaatiginngilara, aamma siunissami AWG-inut peqataaqqinnginnissara annertunerusumik eqqarsaatiginagu. AWG-ertoqarnissaanut sungiusarnerit nuannernerpaajusartut isumaqartuarpunga. Sungiusarsuaartarpugut, pimoorussilluta, angusassaq pitsaanerpaaq anguniarlugu sungiusangaatsiartarluta. Naggammik AWG-ertussaariarama ukioq manna piareersimalluarnissara anguniarnikuuara. Sungiusarnerni siornatigut angusimanngisakka anguakka, aatsaat taama angalanissamut piareersimalluartigalunga misigalunga. Pitsaanerpaaffimmiinneq misigeqqilaarlugu iluarpoq. Inuusuttuaqqat Arctic Winter Gamesimut siunissami periarfissinneqaqqittussaanngitsut sinnerlugit ugguarneruvunga, Tonny Fisker oqarpoq.
Arctic Winter Gamesertoqarnissaatali nalaani uppernarsiartuaarpaa siunissami peqataanissamut periarfissaqaqqissanani.
- Angajoqqaakka angalanissamut billetsersereeraluarput, malinnaaffigisussaagaluarpaannga tapersersorlungalu. Taannartaa uggornaqaaq. Taamatut AWG-ertarnikka naammassinerat uggornarpoq.
- AWG-ertarninni suna puigunaatsinnerpaaviuk?
- Nuummi 2016-mi Arctic Winter Gamesertoqarnera. Tassani isiginnaartut qiimapput, nuliara meeqqakka ilaquttakkalu eqqanniipput, aamma isiginnaartunit malinnaaffigineqarluarpugut. Kisianni aamma unamminerit naligiiffiungaatsiartut puigunngisaannassagakkit, akivoq.
Inuttut pingaarutilik
- Peqataasarninnimi suna misigisanni asseqanngila?
- Fair Play Pin-innaqqaarnera puigunngisaannarpara. Taanna unammisartunut ataqqinnittunut takutitsilluartunullu tunniunneqartarpoq. Katillugit taakkuninnga sisamariarlunga tunineqarnikuuvunga. Kisianni aamma kneel jumpimi kuultinnaqqinnera puigukkiunnikuuara. Tassani siullermeerlunga 2012-mi pissartanngorpunga, 2014-mi sølvinnallunga, 2016-mi pissartanngorfigeqqillugu, Tonny Fisker akivoq.
- AWG-eqataasarnitit ilinnut qanoq isumaqarpat?
- Peqqissuunissap saniatigut tarnikkut iluaqutigisaqaara. Anguniagaqallaqqissinikuuvunga, anguniagara anguniarukku qanoq ilioruma takorloorsinnaalerlugu. Timmisartortartunngorniarlunga ilinniarama tamanna iluaqutigeqaara. Anguniakkat angussagaanni sukataaqqaartoqartariaqartoq aamma ilaatigut paasinikuuara.
Immaqa naggammik GM-ernissaq
Suli timersortassalluni oqaatigaa.
- Soorunami sungiusariarnernut takkutilaartassaanga, taamaattoq tamatiguunngitsoq. Aamma klubbitsinni siulittaasuuginnassaanga. Taamaattoq ukiuni tulliuttuni AWG-eriarnernut angalasarnissara naatsorsuutiginngilara. Aamma volleyballeqqittalernikuuvunga, timersorluni ataqatigiinneq maqaasisimallugu maluginikuuara. Kisianni tassa maannakkut peqqissuunissara ilaqutakkalu pingaartinnerpaalissavakka. Arctic Sportsimi GM-eqataarusuppunga naggammik, naluara tamanna qaqaguussanersoq. Inuit pinnguartartuunera naggaserluarusuppara, Tonny Fisker oqarpoq.