Ataatsimiinneq

TNG tusatsiakkat pillugit oqaaseqartinneqartariaqartoq

Naalagaaffeqatigiit ataatsimiinneranni Qeqertarsuatsiaani rubinisiorfimmi soraarsitsiortornernik tusatsiakkat ingerlaarput

TNG-mi pisortaq, Bent Olsvig Jensen, Qeqertarsuatsiaani oktoberimi 2015-imi takornariartitsilluni assilineqartoq

True North Gemsip (TNG) Nuup kujataani Qeqertarsuatsiaat eqqaani rubinisiorfittaavani ullumikkut takornariartitsisoqarpoq.

Ministeriuneq aamma lagmandi ingerlatsivimmit Naalakkersuisunillu takornariartinneqarput.

Assit takukkit: Kielsenip ilaqutariit Løkkekkut tikilluaqqugai

Tusatsiakkat ingerlaarneranni
Kisianni ullormi tassani tusatsiakkamik ingerlaartoqarpoq, LNS Greenland, TNG-mik peqateqarluni rubinisiorfimmik sanaartortoq akiliisinnaajunnaartoq, taakkulu sanaartornermi sulisui angerlartinneqartut.

Tamanna LNS Greenlandip aamma TNG-p assortugassaanngitsumik Sermitsiaq.AG-mut ilumuunnginnerarpaat.

- Sulisut ilaat angerlartinneqarput, kisianni sanaartornitta naammassiartulernerani tamanna pivoq, pisortaq Bent Olsvig Jensen oqarpoq, taassumalu aamma eqqaavaa feriartoqartoq.

Soraarsitaasoqanngitsoq
- Sulisut sanaartornermik suliassat aalajangersimasut suliaraat, taakkulu naammassipput. Aalajangersimasumik soraarsitsisoqanngilaq.

AG-p suliniut aningaasarpassuarnik amigaateqartoq pingasunngornermi allaaseraa, tamannalu piiaaffiup ingerlanneqarnissaanut akorngutaasoq.

Atuaruk: Rubininik piiaaffik aallartinnissaminut millionilinnik amigaateqarpoq

Aningaasanik amigaateqarnerup sulinersi maanna sunnerpaa?

- Naagga, sunninngilaa, piffissaliussarlu aamma annerusumik malipparput. Ilumoorpoq, aningaasanik amerlanerusunik ujartuivugut, tamannalu neriulluarnarpoq, pisortaq Sermitsiaq.AG-mut oqarpoq.

Powered by Labrador CMS