se billeder
Tjukotka: Festivalimut ´Ergav´-imut peqataajartorit
Ole Jørgen Hammeken Tjukotka-mit oqaluttuamik nassiusseqqippoq, taannalu Ruslandimi nunap immikkoortuata kangillersaraa, tassanilu inuit nunarsuarmi kippasinnerpaami najugallit najugaqarput
Tjukotka-mi novembarimi ´Ergav´ ingerlanneqartarpoq.
Ataani atsiortup ukiut qulit matuma siornatigut Tjukotka tikeraarmagu tamanna pivoq Ishavet kaajallallugu Nordvest- aamma Nordøstpassage aqqusaarlugit umiatsiamik angalanermut atatillugu.
Tamatumani Beringstrædip Ishavetillu sineriaanni illoqarfiit nunaqarfiillu aqqusaartorpavut.
Taamanikkut Tjukotkami pissutsit Sovjetunionip isasoornerata kinguneqaataanik sakkortuunik suli sunnerneqarsimapput - tamatumanilu nunap immikkoortui avannarlerpaat sakkortunerpaamik eqqorneqarsimapput.
Tassami isasoornerup kinguneranik aningaasarsiorneq ajalusoorpoq tamannalu pissutigalugu nunap immikkoortuata pilersorneqarnera unittoorpoq, taamaattumillu ukiuni tulliuttuni 15-ini russit ikinnerussuteqartut 100.000-t sinneqartut Tjukotkamit qimarrapput, innuttaasullu 160.000-niit 52.000-nut ikilisillugit.
Ineriartorneq tamanna, inuiannut kikkunnulluunniit kaannermik ajornartorsiornermillu kingunilik, nunap inuiinut inissaqartitsillualersimavoq, tamatumani ilanngullugit inuiaat Inuit, nunamit aallararneq pissutigalugu ikinnerussutilinni siusinnerusumit amerlanerujussuanngorsimallutik, taamaasilluni maanna nunap inuii 22.000-it Tjukotkami innuttaasut tamarmiusut 40 procenterilersimallugit.
Kingumut qiviarluni tamanna nassuiaatissaavoq ukiut qulit matuma siornatigut nutaamik pisoqalerneranik malugisatsinnut, taamanikkut ilaatigut illut nutaaliat Canadahus-inik taaneqartut nappararneqaleruttorlutik, uagutsinnulli issittumi angalatuunut maluginiagassaanersaavoq kitaamiut aquuteralaat umiaminni baidara-nik taaguutilinni atormatigit.
Aamma atuaruk: Assit: OL-p innera Tjukotkami
Aamma assit takukkit uani "Nunani tamalaani Inuit ulluat Tjukotkami nalliussineqarpoq"
Ullumikkut, ukiut qulit qaangiutereersut, taamanikkut pissutsit eqqaamajuminaapput Tjukotka-mi illoqarfiit pingaarnersaanni ingerlalluartumi avataanillu isigalugu nutaaliami Anadyr-imi angalaarluni, unneqqarsissumik oqartariaqaraluartoq matuminnga allattoq toqqaannartumik sanilliussisinnaanngitsoq, tassa taamanikkut angalanitsinni Anadyr aqqusaarsimannginnatsigu.
Piffissamulli siusinnerulaartumut utissaagut, tassalu Sovjetip pisortaata kingulliup Mikail Gorbatjov-ip Perestrojka-mik atuutilersitsineranut - taanna aqqutissiuussimmat Tjukotkami inuiaat festivaliannut ´Ergav´-imut.
Tamatumunnga tunuliaqutaavoq Sovjetip atuunnerani kulturitoqqat, oqaatsit naleqartitallu naqisimaneqarsimammata inuiaqatigiinni kommunistiusuni kikkut tamarmik naligiissuussammata. Politikkikkut anguniagaq inuiannut ikittunut nunallu inuiinut sakkortuumik eqquisut - Tjukotka-miut ilanngullugit.
Kulturikkut malunniut
Prestrojka aamma Glasnost 1990-imi pisariaqartumik kiffaanngissuseqalersitsipput ´Ergav´-ip aallartinneqarnissaanut, taannalu kulturikkut malunniutaavoq, ileqqutoqqat naleqartitatoqqallu pilerseqqinniarlugit, inuusuttunik kajungilersitsissasoq sorlaminnik ujarlernissaannut.
Festivalip immikkuullarissutigaa Tjukotkami nunap inoqqaavi assigiinngitsut arfineq-marluk kulturikkut oqaatsitigullu assigiinngissutaat akimorlugit ingerlanneqartarami, tassani tjukterinik taaneqartartut amerlanersaallutik 18.000-iullutik, Inuit amerlanerpaat tulleralugu 1.700-uullutik.
´Ergav´ oqaaseq tjukterit oqaasiannit ergavik-imit aallaaveqarpoq isumaqarlunilu ´nuannaarneq, piluarneq anerssaarlu´. Ukioq manna taanna Anadyr-imi ingerlanneqassaaq novembarip 12-anniit 19-iannut, inuit qanittumiit ungasissumiillu illoqarfiit pingaarnersaannukarlutik unammissutigissallugit torlussorneq, ´nunap inuiisa oqaluttuariaasiat´, qiperuineq, nerisassiorneq, tivaneq ilusilersuisarnitoqarlu.