Tine Pars naalakkersuisoqarfimmi pisortaajunnaalersoq
Peqqissutsimut Naalakkersuisoqarfik nutaamik pisortartaartussanngorpoq, naalakkersuisoqarfimmi aalajangersimavoq Tine Parsip ukiuni aalajangersimasuni atorfeqartinneqarnera sivitsorneqassanngitsoq.
Namminersorlutik Oqartussat Peqqissutsimut Naalakkersuisoqarfimmi pisortassarsiorput, atorfiup inuttassarsiuunneqarnerani allassimavoq, pisortatut sungiussilluarsimasumik inuttassarsiuussisoqartoq, pisortanngortussaq ukiumut en million koruunit sinnilaarlugit aningaasarsiaqartinneqarlunilu soraarnerussutisiassanut tapiissutisisassaaq.
Atuuffia sivitsorneqarnianngitsoq
Tine Pars 2017-imi apriilip aallaqqaataani pisortatut atorfinippoq, ukiunilu sisamani atorfeqartussat isumaqatigiissuteqarfigineqarluni. Ukiuni aalajangersimasuni atorfeqarnissamut isumaqatigiissut sivitsorneqarsinnaavoq, matumanili sivitsuisoqannginnissaa aalajangerneqarsimalluni.
Tine Parsip sooq atorfimminik ingerlatsiinnannginnissani oqaaseqarfigerusussimanngilaa.
Atorfiit ingerlatiinnarsinnaannginnakku pakatsivit?
- Oqaseqarfigissanngilara, Tine Pars Sermitsiaq.AG-mut ilisimatitsivoq.
Rektoriusimasoq
Tine Pars naalakkersuisoqarfimmi pisortanngunngikkallarami ukiuni arfineq-pingasuni Ilisimatusarfimmi rektoriusimavoq.
Aamma atuaruk: Tina Pars atorfittaarnermi kingorna: Piffissanngortoq
Atorfimmik inuttassarsiuussinermi ilaatigut pingaartinneqarpoq, Covid-19-imik isumaginnissinnaanerup piffissami matumani qitiulluinnarnera.
- Maannakkorpiaq COVID-19-imik nunarsuaq tamakkerlugu nappaalasoqarnera suliani pingaarnersaavoq, taamaammallu susassaqarfiit attuumassuteqartut suleqatiginerisigut peqqinnissamut tunngatillugu ilisimasaqarluarneq, suliassanut atatillugu naliliisinnaassuseqarluarneq inuiaqatigiillu pisariaqartitaanut tamarmiusunut paasinnissinnaassuseqarluarneq tunngavigalugit Naalakkersuisut aalajangiinissaannut tunngavissiinissaq pingaaruteqarpoq, atorfimmik inuttassarsiuussinermi taamatut allassimasoqarpoq, tassani ilisimatitsissutigineqarpoq februaarip 22-at qinnuteqarnissamut piffissarititaasoq.
Ingerlaavartumik nalimmassaasarnissaq
Pisortassap nutaap suliassai allat ukuusut oqaatigineqarpoq:
- Ukiuni tulliuttuni suliassat pingaarutillit allat ilaatigut tassaassapput inuiaqatigiit agguataarneqarnerinut tunngatillugu unammilligassanut atatillugu immikkut ittumik ingerlaavartumik peqqinnissaqarfimmik nalimmassaanissaq, tamatumalu ilaatigut kingunerisaanik piffissaq ungasinnerusoq eqqarsaatigalugu peqqinnissaqarfik aningaasaqarnikkut annertuumik tatineqalissaaq. Tassunga ilanngullugit peqqinnissamut ataatsimiitsitaliamit pilersinneqartumit aamma inuit peqqissuunissaannut maannakkut suliniutinit suliniutissanillu innersuussutinik attuumassuteqartunik atulersitsineq.
Peqqissutsimut Naalakkersuisoqarfik 18-inik sulisoqarpoq immikkoortortaqarfinnut pingasunut agguarsimasunik, politikkukkullu akisussaanerpaaq tassaalluni Peqqissutsimut Naalakkersuisoq Anna Wangenheim.
Atorfik inuttassarsiuunneqartoq uani takuuk: job.sermitsiaq.ag