Timmisartuutileqatigiiffiit akuersissummik tunineqartussanngornerat Kristiansenimit nuannaarutigineqarpoq

- Aluu Airlines-ip aammalu Greenland Express Air-ip piffisami qanittumi pilersaarusiorsinnaalernissaannut, ussassaarilersinnaanissaannut aammalu Nunatta iluani aammalu Nunatsinnut Nunatsinniillu silaannakkut angallassinissaminnut ilaasussanut issiavissanik tuniniaasinnaalernissaannut annertuumik isumalluarpunga.

Angallannermut naalakkersuisoq Atassummit Knud Kristiansen oqaaseqaateqarpoq.

Timmisartuutileqatigiiffiit taakku marluk Kalaallit Nunaanni angallassisussaatitaasutut politikkikkut akuerineqarnerat taamatut oqaasertalerpaa.

Aamma Kalaallit Nunaata iluani angallassisinnaanissaannut qinnuteqaateqarsimanerat Angallannermut Aqutsisoqarfiup akuersinera nuannaarutigineqarpoq.

Akikinnerulissaaq takornariallu amerlanerulissapput
Silaannakkut angallassinermi unammilleqatigiittoqalerneratigut akit appartinneqarsinnaanerat Knud Kristiansenimit nuannaarutigineqarpoq.

- Naatsorsuutigaara silaannakkut angallassinermi unammillernerup annertunerulerneratigut ilaasunut iluaqutaasumik akit appasinnerulertinneqarsinnaasut. Taamatuttaaq annertuumik isumalluarpunga silaannakkut angallannermi issiaviit amerlineqarnerisigut takornarissat amerlanerusut nunarput alutornartorsuaq immikkuullarissorlu tikeraarsinnaalissagaat.

- Kiisalu naatsorsuutigaara nunaqqatitta nunanut allanut angalasinnaanissaminnut periarfissaat annertusineqassasut taamatullu isumassarsianik misilittakkanik misigisanillu inuiaqatigiit Kalaallit annertuumik iluaqutigisinnaasaannik angerlaassisarnerat annerulersinneqassasoq, tusagassiutinut nalunaarummi Knud Kristiansen oqarpoq.

Angallannermut Aqutsisoqarfimmit akuersissuteqartoqarnissaa Aluu Airlinesimit Greenland Express Airimiillu utaqqineqarpoq.