Skip to main content

Timmisartuussineq: Islandimi ingerlanerliortoqarnera Kalaallit Nunaannut sunniuteqartoq

Ukioq manna nunanit allanit timmisartumik Kalaallit Nunaannukartut ikileriarsimanerannut pissutaasoq Islandimiinnguatsiarpoq, timmisartukkut ilaasoqarpallaarunnaarsimasumi

Ukiuni arlalinni nunanit allaniit silaannakkut Kalaallit Nunaannukartartut amerliartuinnavissimariarlutik maanna ikiliartulersimapput.

Siorna qaammatinut arfineq-pingasunut sanilliullugu 2019-imi qaammatini arfineq-pingasuni ilaasut 813-inik ikileriarsimapput. Tassa 2018-imi januaarip qaammataanit aggustusip qaammataa ilanngullugu 62.947-it Kalaallit Nunaannukarsimanerannut sanilliullugu 2019-imi piffissap taamaalinerani 62.134-t Kalaallit Nunaannukarsimapput.

Air Greenland ilaasoqarnerulersoq

Air Greenlandimi attaveqaqatigiinnermut pisortaq Masaana Egede Sermitsiaq.AG-mut ilisimatitsivoq, timmisartuutileqatigiiffik piffissami pineqartumi nunanit allaneersunik amerlanerulaanik ilaasoqarsimasoq.

Taamaammat ilaasukinnerulersimanermut pissutaasoq Islandimiissagatinneqarpoq, tassa akikitsumik timmisartuussisartup WOW Airip akiliisinnaajunnaarnerata kinguneranik, piffisssami pineqartumi nunanit allaneersut Keflavikkikkoorsimasut 13,4 procentimik ikileriarsimagamik.

Nunatsinnut sunniuteqartoq

Islandimut takornariat ikileriarsimanerat, pingaartumik Islandip Kalaallillu Nunaata akornanni timmisartuussisarnermut sunniuteqarsimannguatsiarpoq.

Visit Greenlandimit ilisimatitsissutigineqarpoq, ukioq manna takornariartitsisarfiup nittartagaanik soqutiginnittut atuisartullu amerleriarsimasut. Visitgreenland.com ukioq manna taamaalilluni 40 procentimik siuariarsimavoq, takornariartitsisartullu amerlasuupilussuit Kalaallit Nunaat takornariarfissatut saqqummersitsinerni assigiinngitsuni tuniniartarsimavaat.

Takussutissaq ataaseq naammanngilaq

- Takussutissaq ataasiinnaq atorlugu takornariat qanoq ineriartornerat nassuiaasiorsinnaanngilarput, Visit Greenlandimi siunnersortaaneq Mads Lumholt ilisimatitsivoq, takussutissanillu allanik tikkuussilluni: akunnittarfinni unnuinerit, umiarsuarmut takornariartaammut ilaalluni takornariarnerit il. il..

Tamatumunnga peqatigitillugu oqaatigaa, takornariat Ilulissat kisiat pinnagu takornariarfissanilli allanik ”takunitsinniarnerat” piffissamik atuinarsinnaasoq, Ilulissanimi aasaq tamaat suut tamarmik ulikkaaqqagamik.

- Ilulissat takornariartarfissuugami, Ilulissani suut tamarmik ulikkaaraangata Kalaallit Nunaannut tamarmut sunniuttarpoq, Mads Lumholdt ilisimatitsivoq.

Piffissat takornariarfiusartut pitsaanerusumik agguataarneqarnissaanerat

- Nittartagarput, saqqummersitsinerit timmisartuutileqatigiiffiillu suleqatigineri aqqutigalugit ukiukkut takornariartoqarsinnaanera takutinniarlugu sulilluartaqaagut, piffissarlu ungasinnerusoq eqqarsaatigalugu tamatumannga ukkataqarnitsigut takornariarfiusartut pitsaanerusumik agguataarneqartalissasut qularinngilarput, Mads Lumholt erseqqissaavoq.

Velkommen til debatten
  • Sermitsiaq.AG ønsker en konstruktiv og god debattone blandt vores læsere uanset uenigheder. Overtrædelse af vores debatregler kan føre til udelukkelse.
  • Anmeldelser af grove kommentarer kan ske ved at klikke på "rapporter" eller ved at ”markere som spam”.

Forsiden lige nu

SENESTE NYHEDER