Timmisartut angalasussat suli unitsiinnarneqartaarput
Marlunngornermi ullaakkut anoreqannginnerugaluartoq, taamaattoq Air Greenlandip angalatitsinissani arlallit unitsereersimavai.
Ataasinngornermi anorersuarujussuarnerani timmisartut aallartussat arlallit unitsinneqarput, illoqarfiillu pingaarnersaanni aqqusinermi angallannissamut periarfissaasut unitsinneqartariaqarsimallutik.
Anoraarutereerpoq, Air Greenlandilli angalatitsinissani marluk ullaaq manna unitsiinnartariaqarpai, tassa Nuummiit Maniitsumut nalunaaqutaq 7.30 aallartussaq aamma Narsarsuarmut nalunaaqutaq 8.20 aallartussaq. Kangerlussuarmut angalanissaagaluit ilai aamma unitsiinnarneqarallarput.
Perserujussuartoq
Nuummi nivattaatit unnuaq naallugu ingerlaartinneqarput, ullaanngormallu aqquserngit ingerlaffissanngoqqissimallutik. Naallu anoraarutereeraluartoq DMI ilisimatitsivoq Kalaallit Nunaata kitaata sineriaani marlunngornermi nittaangaatsiarlunilu persertassasoq.
Kujataani silapilunnerunissaa sillimaffigineqartariaqarpoq.
- Kujataani avannaq-kangisimmik anorsarissaaq, ullulli ingerlanerani anoraarukkiartussalluni. Issisiut sisamanik kiassinnaassaaq, issilissallunilu -3-mut, DMI allappoq.
Piteraq
Tasiilami ataasinngornermi Piterarpoq, maannalu sila atoruminarneruvoq, aqaguli silarluleqqissalluni.
- Aqagu ualilernerani kujataanit aggersumit qulisimanerujartulissaaq, nittaalarluni persilertarlunilu. Avannaaneersumit anorersuartut sakkortutigisumik anorsarissaaq, ulussaarsuartullu sakkortutigisumik anoraasuartassalluni, Tasiilap silap qanoq innissaa pillugu DMI ilisimatitsivoq.