timmisartup ajutoornera
Timmisartut ajutoorsimanerinik misissuisartut Ilulissanukartut
Ilulissani timmisartup ajutoornera politiit misissuleruttorpaat, Timmisartut ajutoorsimanerinik misissuisartuniillu ikiorneqassapput
Suli paasineqanngilaq sooq Ilulissani timmisartoq ajutoornersoq. Piffissaq sivisooq qaangiuppat aamma aatsaat paasinarsiumaartoq ilimanarpoq. Timmisartut ajutoorsimanerinik misissuisartut misissussavaat susoqarsimanersoq.
Timmisartup ajutooreernerata kingunitsianngua timmisartumi ilaasut timmisartumit anisinnaasimapput. Inuilli sisamat napparsimaviliaanneqarput, annertunerusumik ajoqqusinngikkaluartut misissortillutillu nakorsarneqassapput.
- Ilulissani Politiit susoqarsimanersoq misissuleruttorpaat. Timmisartut ajutoorsimanerinik misissuisartut tikippata misissueqataalissapput, politimestereqarfimmit Lars Kirkegaard oqarpoq.
Timmisartumi inuit 15-it ilaasorineqarput, ilaqutaasut Kalaallit Nunaata Politiivinut oqarasuaat 36 52 46-mut sianeqquneqarput tassani susoqarsimaneranik politiit apersorneqarsinnaapput.