Angallanneq
Timmisartumut ilaasut 290-t apuupput - 60-t suli utaqqipput
Timmisartumut ilaasorpassuit sapaatip-akunnerata siuliata naanerani ingerlaqqissinnaajunnaarmata paatsiveerusimaartoqarpoq.
Ilaasut 290-it sapaatip akunnerata naanerani apuuffissaminnut timmisartuunneqarput, massakkullu ilaasussat 60-it missaanniittut apuuffissaminnut timmisartuunneqarnissaminnut suli utaqqipput, pingaarnertut Uummannamut aamma Qaanaamut.
Air Greenland tusagassiuutinut nalunaarummi taama allappoq.
Avannaani illoqarfiit arlallit silarlunnerisa aamma takornarissat angallaffiginerpaasaat ataatsikkoortinneqarnerat Ilulissani paatsiveerusimaartitsinermik kinguneqartitsivoq, ilaasut amerlasuut tassani timersortarfimmi madrassini sinittariaqarlutik.
Nassiussat 2,5 tonsit sapaatip-akunnerata naanerani apuuffissaminnut timmisartuunneqarput, pingaarnertut Narsarsuarmut, kisianni nassiussat 5 tonsit Kangerlussuarmiit Nuummiillu avanaanut kujataanullu ingerlanneqartussat suli amigaatigineqarput.
Pilersaarutit malillugit ilaasussat nassiussallu marlunngornermi apuunneqassapput.
Ilaasussat angalanissaminnut pilersaarutertik pillugu apeqqutissaqarunik 70 12 12-imut saaffiginnissinnaapput, aammalu angalanissanut pilersaarutit Air Greenlandip nittartagaatigut malinnaaffigisinnaallugit.
Aamma atuakkit:
Ilaasut 350-t Avannaani ingerlaqqinnaveertut
Ilulissani ullut qulit aallarneq ajuleqqasut: Nuanninngilaq