Timmisartumut akitsuusiiniarneq naatsorsorneqassasoq siunnersuutigineqarpoq

Naalakkersuisut Mittarfeqarfiit amigartoorutigiligassaannut matussutissatut akitsuusiisoqarnissaa eqqarsaatigaat. Naalakkersuisoqarfimmit siunnersuutigineqarpoq, politikkerit tunngavissaqarluartumik aalajangiiniassammata akitsuutiginiakkap inuiaqatigiit aningaasaqarnerannut kinguneqaatissai naatsorsorneqassasut.

Naalakkersuisut siunnersuutigisimavaat, Mittarfeqarfiit miliuunilikkaanik amigartoorutigiligassaat matussuserniarlugit, timmisartunut ilaasut tamarmik akitsuummik akiliuteqartassasut. Mittarfeqarfiit siunissaat pillugu inatsisissatut siunnersuummi tusarniaassutigineqarsimasumi tamanna allassimavoq.

Aatsitassanut Inatsisinillu Atuutsitsinermut Naalakkersuisoqarfiup tusarniaanermut akissuteqarnermini siunnersuutigisimavaa, akitsuutip taamatut ittup kinguneqaatissai naatsorsorneqassasut:

- Tusarniaassutissatut siunnersuummi attaveqaasersuutinut akiliutinik nammaqatigiiffiusussatut pineqartut, Mittarfeqarfinnut kiffartuussinermut isumaqatigiissutissani nutaani timmisartunik angalasunut tamanut nammaqatigiiffiusumik akiligassanngortinneqarsinnaasut inuiaqatigiit aningaasaqarnerannut kinguneqaatigisinnaasaasa misissoqqissaarneqarnissaat eqqarsaatigineqartariaqarpoq, Naalakkersuisoqarfik allappoq.

Misissueqqissaarnerup akigitinneqarniartut assigiinngitsut politikkikkut tunngavilersuinissaq periarfississasvaa, akissuteqaammi allassimavoq.

Timmisartunut ilaasut tamarmik akitsuummik akiliuteqartinneqartalernissaat Kalaallit Nunaanni Sulisitsisut (GE) ernummatigalugu oqaatigisimavaat. Kattuffimmit ernummatigineqarpoq, akitsuutip Kalaallit Nunaata takornariartitsisartunut allanut unammillersinnaaneranik ajorseriartitsisinnaanera:

Aningaasaqarnermut Naalakkersuisoqarfimmit politikkikkut akuliuttoqartussannginnera qitiutinneqartoq

- Timmisartoqarfissat nutaat eqqarsaatigalugit unammillersinnaaneq eqqarsaatigisariaqarparput, 80 millioner koruunillu missaannik akitsuusiisoqarniarpat, Kalaallit Nunaat timmisartoqarfiillu nutaat tikittarfinnut allanut unammillernermi pilerinarpallaassanngillat, Sulisitsisut pisortaat Christian Keldsen Mittarfeqarfiit pillugit inatsisissatut siunnersuutip tusarniaassutigineqarneranut atatillugu oqarsimavoq.

Aningaasaqarnermut Naligiissitaanermullu Naalakkersuisoqarfik tusarniaassummut annertuumik akissuteqarsimavoq, ilaatigut naalakkersuisoqarfimmit kaammatuutigineqarpoq, Mittarfeqarfiit ingerlatseqatigiiffiup akigititassanik aalajangersaaniarnerani namminneq aalajangiisinnaassuseqarnerusariaqartut.

Ingerlatseqatigiiffik qitiusumit allaffissornermit kiffaanngissuseqarnerulissaaq, Mittarfeqarfiillu aningaasaqarnerisa imminnut ataqatigiinnerulernissaat qulakkeerneqarluni:

KAIR-imut ilanngunneqassasoq

- Sukkulluunniit Naalakkersuisuusut Mittarfeqarfiit A/S-ip akigititanik allannguinissamik qinnuteqaataannik akuerseqqaartariaqannginnerat inatsisip oqaasertaani erseqqissaaffigineqarnissaa eqqarsaatigineqarsinnaavoq, tassa qinnuteqaatit Naalakkersuisut akigititanik aalajangersaanissamut tunngaviliussatut akuerisimasaat naapertuuppata, naalakkersuisoqarfik tusarniaanermut akissummini allappoq.

Mittarfeqarfiit pillugit inatsisissatut siunnersuut, Mittarfeqarfiit Kalaallit Airports Holdingimut immikkoortortaqarfinngortinneqarnissaannik Naalakkersuisut kissaateqarnerannut atatillugu tusarniaassutigineqarpoq.

Kalaallit Airports Holdingimulli immikkoortortaqarfinngortitsinerup Mittarfeqarfiit aningaasatigut ajornartorsiungaatsialernissaat allanngortinnavianngilaa, ingerlatseqatigiiffiummi Nuummi, Ilulissani Kangerlussuarmilu timmisartoqarfinni isertittakkani miliuunilikkaat annaasussaagamigit.

Nuummi Ilulissanilu timmisartoqarfiit Kalaallit Airports Internationalimit pigineqarlutillu ingerlanneqarput, atlantikorlu qulaallugu angallassisarneq Nuummut nuunneqarpat Kangerlussuarmi angallanneq annikillingaatsiassasoq naatsorsuutigineqarluni.

Taamaammat inatsisissatut siunnersuummi, siunissami aningaasatigut piumasaqaatissat Mittarfeqarfinnut qanoq naleqqussarneqarnissaat annertuumik sammineqarpoq.

Powered by Labrador CMS