Timmisartumik angalasut: Qaffariarujussuarneq attanneqarpoq
Ukioq manna qaammatini siullerni pingasuni timmisartumik angalasut ukiup siulianut sanilliullugu 27,4 pct-inik amerleriarsimapput, Naatsorsueqqissaartarfimmit kisitsisit nutaat tamanna takutippaat.
Innuttaasut akornanni angalarusussuseqarnerup uteqqinnera, Air Greenlandimit nuannaarutigineqarpoq.
Timmisartortitseqatigiiffik qaammatip siuliani Naatsorsueqqissaartarfimmit kisitsisit tunuliaqutigalugit taama oqaluttuarpoq, ukioq manna qaammatini marlunni siullerni nunanut allanut angalasut 2022-mut piffissamut tassunga sanilliullugit 26 procentinik qaffariarsimasut tassani takutinneqarpoq. Qaffariarnerujussuaq attanneqarpoq, Naatsorsueqqissaartarfimmit kisitsisit nutaat tamanna takutippaat.
2023-mi qaammatini siullerni pingasuni mittarfinnit arfiniliusunit nunanut allanut timmisartumik ilaasartaammut ilaasut 14.579-it aallarsimapput, tamanna ukiup siulianut sanilliullugu 27,4 pct-inik amerleriarsimapput. (Ataani tabelimi takuuk).
Angalarusussuseq annertusisoq
- Covid-19 pissutigalugu angalasunut killilersuutit ukiuni marlunni atuutereersullu angalarusussuseq annertulluinnartoq isumaqarpunga. Covid-19 2023-mi initunngilluinnarmat, angalarusussuseq annertunerulersoq malunnarsivoq, Air Greenlandimi attaveqatigiinnermut pisortaq Katja Vahl, siornatigut taama ilisimatitsivoq.
Ilanngullugu eqqaavaa 2022-p naajartulernerani Fly'N'Sleep billetsit akikinnerusut atuutilersinneqartut, siumuinnaq Atlantiku qulaallugu timmisartornermi billet 1.595 koruuneqalerluni. Neqeroorut taanna amerlasuut pisiarisimavaat.