Timmisartumi toqusimasoq: Ikiaroornartut iisimallugit eqqusseriaasoq
Angut 33-nik ukiulik Danmarkimiit Kangerlussuarmut timmisartorsuarmut ilaatilluni pingasunngornermi toqusoq, ikiaroornartunik nunatsinnut anngiortumik eqquteriakkaminik iijoraasimanerminit toqquteqarsimavoq.
Angut 33-nik ukiulik pingasunngornermi 22. juni 2022 Københavnimiit Kangerlussuup tungaanut timmisartorsuarmi ilaanermi nalaani toquvoq. Misissuinerit siulliit takutippaat angutip aqajaruani ikiaroornartoqarsimasoq, Kalaallit Nunaata Politiivi tallimanngornermi taama tusagassiorfinnut nalunaaruteqarput.
- Angutip toqunera nalinginnaasutut taaneqarsinnaanngimmat angutip timaa ammarlugu misissorneqarsimavoq. Misissuinermi paasineqarpoq angutip aqajarua ikiaroornartunik annertulaartunik imaqartoq, timmisartunnginnermini timmisartornerulluunniit nalaani iisimasinnaasaanik.
Misissuinermi paasisat tunngavigalugit politiit qulakkeerpaat ikiaroornartut poortorneri naammassimanngimmata, ikiaroornartut angutip timaanut sunniuteqartitsilersimasut, angutillu taakku toqqutigisimagai.
Inuit ikiaroornartunik iisillutik timmisartorsuarmut ilaallutik nunatsinnut anngiortumik eqqusseriarsimasut ukioq manna arlaqarput.
Kalaallit Nunaata Politiivi 2022-mi maannamut 23-nik nalunaarutiginninnernik tigusaqarsimapput, ikiaroornartunik iisisimallutik nunatsinnut eqqusseriartutut pasitsaanneqartunik, politiit ilisimatitsipput.