Air Greenland
Timmisartumi billetsit akii apparnagit amerlasoorsuarnik agguagaqarsisitsivoq
Timmisartortitseqatigiiffissuup ingerlatsinera pillugu Air Greenlandimi siulersuisut siulittaasortaavat Sermitsiap apersorpaa
Namminersorlutik Oqartussat, naalagaaffik SAS-ilu Air Greenlandimik piginnittutuatut nunami timmisartortitseqatigiiffiit annersaanni ukiumut isertitaqarluartarput.
Sermitsiaq.AG-p ataasinngormat allanneratut piginneqataasut ukioq manna agguagarsiassat 274 millioner koruunit agguartussanngorpaat.
Tamannalu pivoq tuniniaavimmi nunarsuarmi ilaasukinnerpaaffiusartumi.
Tamannalu peqatigalugu Kalaallit Nunaannut Kalaallillu Nunaannit aammalu nunap iluani timmisartorneq suli akisoorujussuuvoq. Siulersuisunut siulittaasunngorlaaq tamatumunnga qanoq isumaqarnersoq aperaarput.
Billetsit akisuvallaannginnerarpai
Sooq 274 millioner koruunit assersuutigalugu nunap iluani timmisartornermi billetsit appartinnerannut atunngilisigit, taamaaasilluni timmisartorneq akikinnerulersillugu?
– Air Greenland tamatumani annertuunik iliuuseqareersimavoq. Angalanikiffiup nalaani nunap iluani billetsit appasissuupput. Assersuutitut taasinnaavara meeqqanut billetsit akii appartissimagatsigik, Air Greenlandilu taamaasiorsimavoq Naalakkersuisut ukioq 2016 meeqqat ukiuattut suaarutigimmassuk, Søren Lennert Mortensen akivoq.
´Nalinginnaasuulluinnartoq´
– Qaqutigoortuunngilarlu piginneqataasut agguagarsisinneqartarnerat. Agguagarsisitsisoqarnissaanut piginneqataasut pingasut tamarmik isumaqatigiissapput. Namminersorlutik Oqartussat kisimik aalajangigassarinngilaat, paasisinnaalluarparalu agguagarserusummata.
Taamali amerlatigisunik agguagarsisitsinissaminut Air Greenland akissaqarpa?
– Agguagarsisitsigaluarluta akiliisinnaassuseqarnerput qaffasissuuvoq (aningaasanik amerlanerusunik annaasaqaratarsinnaanermut sillimmatit, aaqqiss.) 65,5-iulluni. Tamatuma saniatigut nammineq aningaasaateqarpugut 900 millioner koruuninik, akiligassakitsuararsuulluta ukiullu tamaasa sinneqartooruteqarluartarluta. Air Greenland niuernikkut ingerlalluartorujussuuvoq, siulersuisut siulittaasuat oqarpoq.
Oqaluttuaq tamaat Sermitsiami sapaatip akunnerani saqqummersumi atuaruk, taannalu ullumi saqqummerpoq