Timmisartukkut ilaasut ingerlaqqissanersut Islandimi nalornissutigineqartoq
Air Greenlandip Keflavikimit Nuummut timmisartuussinissaraluaq tallimanngormat unitsiinnarpaa, ilaasut ullumi nal. 17.15 tikittussaangaluarput. Ilimagineqarpoq timmisartuussinissaq ingerlanneqassasoq
Kalaallit timmisartunut ilaasut, maanna Keflavikimiittut, qanoq ilillutik Kalaallit Nunaannut ingerlaqqissanersut nalornissutigineqalersimavoq, naakka ullumi nal. 17.15 tikittussamut bilitseqareeraluartut.
Danmarkimi ministeriunerup Mette Frederiksenip ippassaq Danmarkimi innuttaassusillit nunani allaniittut, nunailu pineqartuni aalajangersimasumik angerlarsimaffeqanngitsut tamaasa, taamalu aamma kalaallit angerlaqqullugit kaammattorpai.
Maannali nalornissutigineqalersimavoq nunatsinni najugallit Keflavikimiittut qanoq qagugulu angerlarsinnaanersut.
Pisariaqartitsisoqarnersoq nalornissutigineqartoq
- Tassa ippassarli timmisartuussinissamik unitsitsiinnaratta, timmisartukkut ilaasut bilitsiminnik allanngortitsisimasinnaapput, taamalu toqqaannartumik Nuummukarnissamik pisariaqartitsinatik, Masaana Egede Air Greenlandimi attaveqaqaqatigiinnermi pisortaq nassuiaavoq.
Taassuma ilisimatitsissutigaa, sullitanut kiffartuussivik kalaallit qassit bilitsiminnik allanngortitsisimanersut paasiniarlugu tamaviaarluni suliaqartoq.
- Keflavikkimummi timmisartumik ingerlatitsignissaq isumaqanngilaq, utimut ilaasussaqanngippat, attaaveqaqatigiinnermi pisortaq oqarpoq.
Timmisartuussisoqarnissaanik neriorsuisoq
-Nunatsinninngaanneersut Keflavikkimiittut bilitsiminnik allanngortitsisimanngitsut timmisartuukkiartorlugit timmisartuuterput Dash-8 aallartissagipput qularutigineqassanngilaq, taanna erseqqissaavoq.
Kalaallilli oqartussat angerlaqqusillutik inassuteqaataannik malinninnartut, Air Greenlandip nittartagaa aqqutigalugu Keflavikimiit Nuummut bilitsimik inniminniisinnaanngillat. Timmisartuutileqatigiiffiup ullumi bilitsimik inniminniisinnaaneq pingasunngorpallu aallarnissamut inniminniisinnaaneq unitsissimannguatsiarpaa.
Taamaalillutik kalaallit Amerikap nunavittaaniittut Københavnikkoortlutik timmisartortariaqalersimarpasipput.
Masaana Egedep ilanngullugu ilisimatitsissutigaa, Keflavikkimiit Nuummut pingasunngorpat timmisartuussisoqassanersoq suli aalajangiiffigineqanngitsoq.