Timmisartukkut angalasut ikileriaqqissimasut

Ukioq manna qaammatini siullerni arfinilinni nunamiit timmiartukkut aallarsimasut, siorna piffissamut tamatumunnga sanilliullugu 31,1 procentimik ikinnerupput.

Coronap nunarsuarmi tuniluunnera, tamatumalu malitsigisaanik angalanissamut killilersuutit silaannakkut angallassisartunut suli sakkortuumik ilungersuatitsipput.

Naatsorsueqqissaartarfimmit kisitsisit kingulliit takutippaat, januaarimiit juunimut Kalaallit Nunaanniit timmisartukkut aallarsimasut 31,1 procentimik ikileriarsimasut.

Ikileriarsimanerannut nunarsuarmi tuniluuttoqarnerata malitsigisaanik siorna angalanissamut killilersuutit atuutsinneqalersimanerat pissutaavoq.

Ukioq manna kisitsisit 2019-imi kisitsisinut sanilliukkaanni takuneqarsinnaavoq, nunamiit aallarsimasut amerlassusaat 71,5 procentimik ikileriarsimasut.

Ukioq manna aallarsimasut qaammatit siulliit pingasut ingerlaneranni ikileriarnerpaasimapput. Qaammatini kingullerni pingasuni ilaasimasut siornarnit amerlanerungaluarput.

Powered by Labrador CMS