Timmisartuaraq drone timmisartumik kinguaattoortitsisoq
Timmisartuaqqamik dronemik unioqqutitsilluni timmisitsineq Sisimiuni mittarfimmi timmisartup aallarnissaanik tallimanngornermi unnukkut kinguaattoortitsivoq.
Politiit Sisimiuni mittarfimmit tallimanngornermi unnukkut arfineq-pingasut missaanni nalunaarfigineqarput, timmisartuaqqap mittarfimmut qanittuararsuulluni timmineranik timmisartullu aallarnissaraluata taamaalilluni akornuserneqarsimaneranik.
Kalaallit Nunaanni Politiini pigaartut ittuat, Mads Lynge, Sermitsiaq.AG-mut taama paasissutissiivoq.
Mittarfimmi sulisut timmisartuaqqamik dronemik ingerlatitsisoq sumiiffissiniarsimagaluarpaat, iluatsinngitsumilli.
Akiliisitsissutaasinnaasoq
Taamaattumik politiit mittarfiliartitsipput, politeerli takkummat timmisartuaqqamut ingerlatitsisuanulluunniit tunngasunik takussaasoqanngilaq. Timmisartuaraq tammakarmat timmisartoq aallarsinnaanngorsimavoq.
- Timmisartuaraq kimit aqunneqarsimanersoq paasisimanngilarput, ilimanarporli timmisartuaqqanik timmisitsinermut maleruagassanik ilisimasaqanngitsuusimassasoq, Mads Lynge oqarpoq.
Taanna erseqqissaalluni oqarpoq, timmisartuaqqamik timmisitsineq pillugu nalunaarummi maleruagassnik unioqqutitsineq akiliisitsissutaasinnaasoq. Maleruagassani ilaatigut allassimasoqarpoq, mittarfiit eqqaanni timmisartuaqqanik timmisitsisoqaqqusaanngitsoq.