Timmisartortitseqatigiiffinnik ujarlerneq aallartippoq
Kalaallit Airports ataatsimeersuarnerni peqataasarpoq timmisartortitseqatigiiffiillu, mittarfinnik nutaanik atuinissaminnik soqutiginnittut, naapittarlugit.
Ukiut marluk qaangiuppata Nuummi mittarfissualiaq naammassineqassaaq, aappaaguanilu Ilulissani mittarfiup tallineqarnera aamma naammassineqassalluni, aviisi Sermitsiaq allappoq.
– Taamanikkussamut Amerikamit Avannarlermit Europamillu nunatsinni takornariartarfinnut timmisartorneq ajornannginnerulissaaq. Air Greenlandilu killissaa tikillugu unammillerneqalissaaq, taamaattumik angalanerit aamma akikinnerulissapput, Kalaallit Airports Holding A/S-ip (Kair) pisortaa Jens R. Lauridsen siulittuivoq.
Air Greenlandip pisortaa Jacob Nitter Sørensen sapaatip akunnerani kingullermi Sermitsiamut oqarpoq Air Greenland Amerikami Avannarlermi Europamilu illoqarfissuarnit timmisartuussivinnut nutaanut timmisartortitseqatigiiffinnik allanik suleqatissarsiortoq.
– Mittarfiit namminerminni pilerinarsaataanngillat. Mittarfiit atorneqartussatut sananeqarput, taamaattumik sanaartornermik suliniutit saniatigut Kair Ilulissani Nuummilu mittarfinnut atuisartussanik nutaanik pissarsiorpoq.
– Suliniummut tamarmut tunngavissaavoq sammisaqarfiup annertusarneqarnissaa – tassa timmisartut aallartartut tikittartullu amerlanerujussuussasut. Takornarianik nunarsuarmit tamarmeersunik ilaasullit. Anguniagaq tamanna aallaavigalugu takornarialerisut sulipput – tunuliaqutaavorlu maanna Nuummi Ilulissanilu akunnittarfiit amerliartornerannut, Jens Lauridsen Sermitsiamut oqarpoq.
Allaaserisaq tamaat uani Sermitsiami piaralugu aasinnaasanni atuaruk: