s-61-ip nalliuttorsiutiginera
Timmisartortartoq soraarneq: Isumaqarpunga S-61 suli ukiuni 30-ni atorsinnaasoq
82-inik ukiullip Erik Bolvinkelip ukiut 50-it matuma siornatigut Sikorsky-mik timmisartoqqaarnerit siullerpaat Nuummi hangarimi oqaluttuarai. Aana oqaluttuaa
Sapaatit akunnerisa marluk matuma siornatigut helikopterit Kangerlussuarmi nalliuttorsiutigineqarput, sapaatillu akunnerata uumap naanerani Nuummi nalliuttorsiutigineqarput. Air Greenlandimi sulisut pulaartut untritilikkaat helikopterinut Sikorsky-nut, ukioq manna Kalaallit Nunaanni atugaanerminni ukiunik 50-iliisunut, tikilluaqquvaat.
Ornigaatit nuannarineqarnersaraat Nuuk qulaallugu helikopterernerit hangarimilu nerriverujussuaq kaffillerfik. Takuniaasorpassuit akornanniippoq Erik Bolvinkel, timmisartortartuuvoq soraarneq, taannalu oqaluttuarpoq (assi ataani takuuk).
– Aap, ullumikkut ilaasuinnartut timmisartortarpunga, angut 82-inik ukiulik uummaarissoq qungujulluni oqarpoq, Grønlandsflymi sulileqqaarnerminik assinik takutitsiitigaluni.
Sivisuumik atorfeqarsimasoq
1951-imi sakkutuuni timmisartortartuni aallartippunga, USA-mi timmisartunik malersuutinik ilinniarfimmi ilinniarsimallunga unnuakkullu timmisartuni malersuutini ingerlaaqatigiinni peqataasarsimallunga, Erik Bolvinkel oqaluttuarpoq, taannalu nunatsinni timmisartortartoqatigiit siullerpaat ilagisimavaat.
– Aallaqqaammut tiimmisartortartut arfineq-pingasuuvugut, qallunaat tallimat norskillu pingasut.
– Kalaallit Nunaanni timmisartornerni ukiuni siullerni piumasaqaataasimavoq nunamik ilisimanninnissaq. Tssa imaappoq, timmisartortartutut ´atortut atornagit´ timmisartortoqarsinnaassaaq, nunallu ilisarnaatai malillugit sumiissusersiorsinnaassalluni.
Statens Luftfartsdirektorat Grønlandsfly-lu piffissap ilaani silasiortumik sulisoqalerput Kalaallit Nunaanni aalajangersimasumik sulisumik, Erik Bolvinkel hangarimi scenemit oqaluttuarpoq.
– Silasiortoqarneq iluaqutigisorujussuuvarput. ilaanneeriarlunili timmisartortartut silamik ilisimasaqarnerat isumannaallisaataasarpoq, timmisartortartoq utoqqaq oqaluttuarpoq.
S-61 nunamut tikiuppaa
Helikopterit S-61-it marluk atorneqalermata Erik Bolvinkel taakkuninnga aalleqataasimavoq. Helikopterillu taakkua marluk ullumi illoqarfiit pingaanersaata qulaani angalaarnermi atorneqarput. Ullumikkut S-61-it annaassiniarluni sungiusarnermi atorneqarnerusarput, qangali nunatsinni silaannakkut angallassinermi tamangajavimmi atorneqarsimapput. Helikopterit Sikorsky-t nunatsinni ima timmisartuussisartigisimapput, assigiinnarlugu ukiuni tallimani kipitinnagu silaannarmiissimasut, nunarsuaq 185-eriarlugu kaajallassimagaat imaluunniit quleriarlutik qaammammukartarsimasut uterlugulu, timmisartortartut ilaat, ullumikkut silaannaap Dronningianik timmisartortartoq, nassuiaavoq.
Atanertoqisut
Piffissami telefonit pisarinerannit ukioq ataaseq marlulluunniit qaangiuttut iginneqartartut, aammalu qaqutigoortuunngitsoq biili ukiuni tallimaniit qulinut taamaallaat ingerlaarsinnaasoq, eqqumiiginarsinnaavoq Air Greenlandip helikopterit marluk, ukiut 50-it matuma siornatigut pisiarineqarsimasut, ullumikkut suli pigimmagit atorlugillu. Aviisimit allaaserisatoqqamit qiukkami Hangarimi atuarneqarsinnaavoq Grønlandsfly-p 1980-ikkunni pilersaarutigigaa helikopterit ´1990-ikkunni piffissap ilaani´ taarserneqarnissaat.
S-61 suli ukiorpassuarni atussangatippaa
Helikopterit pitsaalluinnartuupput, timmisratortartuusimasoq Erik Bolvinkel pulaartunut soqutiginnittunut mikrofonikkut oqarpoq.
– Sivisoorujussuarmik atasinnaarpasippoq. Piginnaasami ilaatigut killissaqarpoq, qularutissaanngiarli suli ukiorpassuarni atorsinnaassasoq. Isumaqarpunga Kalaallit Nunaanni suli ukiuni 30-ni timmisinnaassasoq.
Erik Bolvinkel Kalaallit Nunaanni timmisartuusseqqaarami kunngikkut timmisartuuppai. Taamanikkut Kunngi Frederik aamma Dronning Ingrid. S-61-imik Kangilinnguaniit "Julianehåb"-imut, Nanortalimmut "Godthåb"-imullu timmisartuuppai, kingornalu Erik Bolvinkel-ip kunngi dronningilu nipiliunnginnerusumik DC4-mik Narsarsuarmiit Kulusummut timmisartuuppai. Isumannaatsumik apuunnerminnut akissarsissutigalugu timmisartortartup Grønlandsfly-llu pisortaata Valdemar Lauritsenip kunngikkut sakkutuut umiarsuaaraannik alapernaarsuummik angalaqatigaat.
Spiesimi timmisartortartuusimavoq
Erik Bolvinkel 1970-imi Danmarkimut uterpoq, tappavanilu ukiuni 21-ni Statens Luftfartsdirektoratimi nakkutilliisutut sulilluni. Timmisartortartut allagartartaartinneqannginneranni misilitsittarpai. Erik Bolvinkel piffissap ilaani aamma Danmarkimi Sverigemilu Sikorsky-p sinniisuatut sulisimavoq, allanissaarlu aamma sulisimalluni.
Kalaaliinnalli kunngikkormiullu kisiisa Erik Bolvinkelip timmisartuuttarsimanngilai. Ukiuni arlalinni selskabini Nordair-imi aamma Simon Spies-ip timmisartortitseqatigiiffiani Conair-imi timmisartortartuusimavoq.
– Aap. Oqaluttuarlu tamaanga killeqarniarli, Erik Bolvinkel oqarpoq.
– Grønlandsfly - aa usi naamik - Air Greenland helikopterit nalliuttorsiutigineranni pilluarit.