Timmisartorsuaq Københavnimi ajutoorpoq
Marlunngornermi unnukkut Air Greenlandip Airbusiutaa nutaaq Københavnip mittarfiani ajutoorpoq. Ajoqusernerisa iluarsineqarnissaannut aaqqiissutissanik nassaartoqarnissaata tungaanut, timmisartorsuup ingerlanngikkallarnissaanik tamanna isumaqarpoq.
Air Greenland ajutoornernik nalaataqaqattaarpoq. Dansk Metalip sapaatip-akunnerata aallartinnerani suliumajunnaartoqarnissaanik aasaanerani angallattoqarnissaanik tatisilluni ilimasaarinerata kingorna, marlunngornermi Air Greenlandip Airbusiutaa A330neo Tuukkaq ajutoorpoq.
Timmisartup marlunngornermi Københavnimut minnerata kingorna, ilaasullu nioreerneranni Aviatorimi sulisut pisarnermisut unnuaanerani hangarimiittussanngorlugu inissikkiartorpaat. Ajoraluartumilli ingerlannerani SAS-p timmisartua aporpaat, tamannalu Tuukkap suluusaatigut ajoqusertoqarneranik kinguneqarpoq.
- Ajoqusernerat ingasappasinngilaq, kisianni soorunami suna tamarmi ajoquteqartussaanngilaq, taamaattumik isumannaallisaaneq pingaartinneruarput, Air Greenlandimi attaveqaqatigiinnermut pisortaq, Katja Vahl, Sermitsiaq.AG-mut oqaluttuarpoq.
Qujanartumik atortutigut taamaallaat ajoqusertoqartoq
Ajutoortoqarneranut atatillugu inunnik ajoqusertoqarsimanngitsoq oqaatigaa, Airbusilu iluarsartuunneqarluni suliarineqassasoq nassuiaalluni.
- Imaaliallaannaq iluarsineqarsinnaanngilaq. Tuukkaq arfininngorpat tungaanut aamma ajoqusernerata iluarsaanneqarsinnaanerata paasineqarnissaata tungaanut uninngagallarpoq.
Pingasunngornermi ilisimaneqareersutut Tuukkaq Københavnimit timmisartuussineq ajorpoq, Air Greenlandillu maanna aqagu sisamanngornermi timmisartumik taartaasinnaasumik nassaarniarluni maanna ulapputigaa.
- Piaartumik aaqqiissuteqarnissarput naatsorsuutigalugulu neriuutigaarput. Ilaasut paasisaqarnerujumallutik nittartagaq nakkutigisinnaavaat, Katja Vahl oqarpoq.
