Timmisartoqarfiup illutassaa nappaanersiorneqartoq
Nuummi timmisartoqarfissaq ataasinngornermi nalliussineqassaaq, tassani sulisut sanaartoqataasullu nappaanersiornermi katersuutissapput.
Nuummi mittarfissaq nutaaq timmisartumit siullermit miffigineqariaannanngulerpoq. Mittarfissalli suliarineqarnera kisimi naammassineqangajalinngilaq.
Timmisasrtoqarfiup illutassaasa suliarineqarneri aamma ingerlalluarput, pingaartumik terminalissaq nutaaq Nuup nunataani initulereersimallutik.
Illutassaalumi ataasinngornermi nappaanersiutigineqarput, tassani sanasutut suliaqarsimasut tamarmik ileqquusumik nappaanersiortoqarnissaanut qaaqquneqarsimapput, ilaatigullu pølsinik sodavandinillu sassaallerfigineqarlutik - soorunami aamma ileqquusutut kransi nappaanersiornermi ikkunneqartartoq ikkunneqarsimavoq.
MT Højgaard timmisartoqarfiup illutassaanik tamanik sanaartortuuvoq, Titartaasarfillu Zeso Architects terminalissamik nutaamik titartaasuusimalluni.
800 kvm aappaagu naammassineqarsimassangatinneqartoq
Terminali 8000 kvm-it missaannik angissuseqassaaq, suliaralugulu naammassineqaruni ilaatigut akitsuuteqanngitsunik pisiniarfeqarlunilu utaqqisarfeqassalluni.
Suliat tamarmik ajunngitsumik ingerlassappata, terminali 2023-p naanerani piareersimassasoq naatsorsuutigineqarpoq.
Nappaanersiortoqarmat MT Højgaard, sanasut, suliffeqarfiit ikiuussimasut sanasitsisullu siunnersortaat Inupla, TNT Niras-ilu ilaatigut peqataapput.