Timmisartoqarfissat nutaat: 2021-mi angusaqarnerusoqassaaq
Kalaallit Nunaata oqaluttuarisaanerani sanaartukkat annersaat: nutaanik pingasunik timmisartoqarfiliorneq pineartillugu 2021-mi erseqqinnerusunik angusaqartoqarnerussaaq.
Nuummi Ilulissanilu timmisartoqarfiliornerit timmisartuutileqatigiiffip siusinnerusukkut nalunaarutigisimasaatut kinguaattoorfioqqittusatut isikkoqanngillat. Kalaallit Airportsimi pisortanngorlaaq Jesn Lauridsen Sermitisaq.AG-mit apersorneqarluni taamatut ilisimatitsivoq, tassani aamma ingerlatseqatigiiffip ukiumi nutaami suliassaasa killiffii suunersullu ilisimatitsissutigai.
- Timmisartoqarfiit taakku ammaanersiorneqarnissaannut piffissaliussatta malinnissaa naatsorsuutigaarput. Nuummi 2023-mi ukiakkut, Ilulissanilu 2024-mi ukiakkut, Jens Lauridsen oktobarip 16-iani pisortanngortoq oqarpoq.
Sulilernissaa siuartinneqarsimasoq
Jens Lauridsenip sulilernissaa kingusinnerusukkut pisussatut pilersaarutaagaluarpoq, siulersuisunili siulittaasoq Johannses Egholm Hansen nalunaariasaarmat tunuarniarlni, pisortassap nutaap sulilernissaa siuartinneqarsimavoq.
Illoqarfinni pineqartuni pingasuusuni innuttaasut 2021-ip ingerlanerani sanaartornerit allanngoriartorneri malugissavaat. Jens Lauridsenip anguniakkat uku pingasut taavai:
Nuuk:
Pilersaarutaallunilu naatsorsuutigineqarpoq, Nuummi mittarfiup nutaap ilaa siulleq 2021-mi ukiassakkut/ukiakkut ammarneqarnissaa, aamma mittarfiup avannaata tungaaniittup aallartinneqarnissaa eqqarsaatigalugu timmisartukkut angallannerit tamarmik mittarfik nutaaq aqqutigalugu pisalernissaat.
Mittarfiup illutassai napasuliartassaalu 2021-mi ukiassakkut suliaralugit aallartinneqarnissaat pilersaarutaavoq.
Ilulissat:
Ilulissani mittarfiliorneq upernaakkut aallartinneqassaaq, aasallu ingerlanerani illutassaata inissaanik sanaartorfigissaasoqarlunilu sineriammut isumannaallisaassut aallartinneqassaaq.
Qaqortoq:
IQaqortumut tunngatillugu suliniutip aallartisarneqaqqinnissaa siunnerfeqarluartumik sulissutigineqarpoq, naatsorsuutigaaralu 2021-mi ukiassakkut sulineq aallartinneqassasoq.
Ilulissat Qaqortorlu:
Ilulissani Qaqortumilu timmisartoqarfiup illutassaanik sanaartorneq 2021-mi aallartinneqassasoq pilersaarutaavoq.
Kalaallit Airportsimi pisortap ilisimatitsissutigaa, 2021-mi timmisartoqarfissat pingasuusut tamarmik atuutsinneqalernissaat ukkataralugit suliaqartoqarniartoq.
- Tamatumunnga atatillugu annertunerusunik annikinnerusunillu suliassaqarpoq. Pingaartumik oqartussanit akuerisassat timmisatoqarfinnullu atatillugit kiffartuussisarnissat ukiuni aggersuni ukkatarlugit suliarineqassapput, Jens Lauridsen nassuiaavoq.
Aningaasatigut iluanaaruteqarneq
Timmisartoqarfissat aningaasatigut iluanaaruteqarnissaannut apeqqutaavoq, timmisartuutileqatigiiffiit timmisartoqarfinnik atuissanersut.
- Silaannakkut aqqutit nutaat pilerinarsarniarneqarnerat minnerpaamik ukiunik pingasunik sivisussuseqartarpoq, taamaammat suliassaq tamanna nukinginnarsilerpoq, pisortaq erseqqissaavoq.
Kalaallit Airportsimit suliffeqarfik Airport Strategy & Marketing juullinngitsiartoq isumaqatigiissuteqarfigineqarpoq, tassani nunani taalaani silaannakkut aqqummik inerisaanissaq siunertaralugu.
Ilanngutassiaq atuaruk: KAIR timmisartumik aqqutissanik nutaanik inerisaalersoq
Timmisartuutileqatigiiffik coronap nunarsuarmi tuniluunneranit sunnerneqarsimanngilaq, pingaarnertulli sanaartortut Munck Gruppenip Namminersorlutik Oqartussat killersuutaat sakkortuut pissutigalugit sulisumi taarsernissaat unammillernartoqartissimavaat.
- Aaqqiissutissarsisoqarsimavorli, tassani angalanernut killilersuutinut aaqqiissuteqartoqarsimavoq, Jesn Lauridsen ilisimatitsivoq.
Taassuma ilisimatitsissutigaa, suliassat taamak annertutigisut tamatigut unammillernartoqartartut, ”tamarmilli isumagineqarsinnaasartut”, erseqqissaatigineqarpoq.