Timmisartoqarfissaq nutaaq: Atortut eqqortut 100 procentimik mitsitsisinnaappat?
Timmisartunut mittarfinnullu atortoqarpoq Nuummi timmisartorsuarnut mittarfissamut pitsaanerujussuarmik mitsitsisinnaasunik. Atortulli taakku akisuupilussuupput aamma atuutsinneqalissappata qaqqamik annertoorujussuarmik qaartiterisoqartariaqassaaq.
Nuummi timmisartorsuarnut mittarfissap nutaap miffigiuminartuunera timmisartoqarfiup iluatsittumik ingerlanissaanut aalajangiisuusinnaavoq. Apeqqut tamanna aasaq manna Nuummi silarluttarnera pissutigalugu angallassinissamik taamaatitsiinnarnerpassuit pimmata inuit attaveqaqatigiittarfiisigut oqaluuserineqarsimaqaaq.
Nittartakkami matumani mittarfiup miffigiuminartuunissaanik ilanngutassiaqarnermut atatillugu atuartartumit apeqqutigineqarsimavoq, Kalaallit Airports atortorissaarummik ILS (instrumentlandings system) CAT III C-mik atuutsitsilersinnaannginnersoq. Atuartartormi naapertorlugu, atortorissaarut atorlugu timmisartortartoq iliuuseqanngikkaluartoq timmisartoq missinnaavoq - tassa timmisartortartoq taamaallaat kigaallatsitsinermut allamulluunniit sangunissamut iliuuseqarsinnaatillugu, tamannali nalinginnaasumik nammineerluni pisarpq.
Timmisartut eqqortunik atortoqartillugit atortorissaarut timmisartup minnissaanik qulakkeerinnissinnaavoq.
- KAIR ILS CAT III C-mik atortulersuisuuppat mittarfik 100%-imik miffigineqarsinnaalissaaq - tassa timmisartortitseqatigiiffiit eqqortunik atortoqarpata tamanna pisinnaavoq, atuartartoq tunngavilersuisimavoq.
Kubikmeterit miliuunilikkaat qaartiterneqartariaqassasut
Kalaallit Airportsimilli ajoraluartumik atortorissaarut Nuummi atorneqarsinnaanngilaq.
Kalaallit Airportsimi paasissutissiisarnermut akisussaasoq Mikkel Bjarnø Lund taamatut nassuiaateqarpoq:
- Mittarfiit ILS Cat III-mik atortorissaaruserneqarnissaat akisuupilussuussaaq aamma tamanna ajornarpoq, ilaatigut ungalulersuinissamut piumasaqaateqarnerusoqarmat. Atortorissaarullu atorneqassappat qaqqaq kubikmeterinik miliuunilikkaanik annertutigisoq qaartiterneqartariaqassalluni.
- Taamaammat tamanna suliniummut ilaatinneqaranilu akissaqartinneqanngilaq, Mikkel Bjarnø Lund oqarpoq.
Miffigiuminarnerunissaa naatsorsuutigineqartoq
Atortorissaarut Nuummi atorneqarsinnaanngikkaluartoq, Kalaallit Airportsimit naatsorsuutigineqarpoq, Nuummi mittarfissaq maanna mittarfimmut sanilliullugu miffigiuminarnerussasoq.
Kalaallit Airportsimit siusinnerusukkut ilisimatitsissutigineqarpoq, mittarfiup miffigiuminartuunera maanna 89/90 procentiusoq 95 procentimut qaffakkumaartoq.