Timmisartoqarfissaq nutaaq putsertarneranit qanoq sunnerneqassava?

Kitaani aasaq manna timmisartorfigissallugu silarluppallaartarsimavoq, Nuummilu Timmisartoqarfik angallaffiusaqisoq eqqornerlunneqartarsimalluni.

Ilaasut naammagittartariaqarsimapput, inuillu attaveqaqatigiittarfiisigut aallartoqarnissaanik taamaatitsiinnartarnernut atatillugit apeqqusersuisoqartarluni: Nuummi timmisartorsuarnut mittarfissaq nutaaq silarlutillugu aamma taamaatitsiinnarnernik kinguaattoornernillu eqqorneqartassava?

Sermitsiaq.AG-mit apeqqut tamanna Kalaallit Airportsimut (KAIR), timmisartoqarfiliorlunilu ingerlatsisussamut akissutissarsiniarneqarsimavoq. KAIR-imit oqaatigineqarpoq, timmisartoqarfik maanna timmisartoqarfimmut sanilliullugu miffigiuminarnerussasoq, silarlutsilluguli suli timmisartuussinissanut sunniuteqartassasoq oqaatigineqarluni.

Atortut nutaat

Kalaallit Airportsimit oqaatigineqarpoq, timmisartoqarfissaq nutaaq miffigiuminarnerutinniarlugu silasiutinik teknikkikkullu atortorissaarutinik arlalinnik ikkussuiffigineqassasoq.

Localizer-it timmisartut isikkiviluttumi minniartillutik sumiissusersiutigisarpaat.

Aamma Glide Path-imik taaneqartartoq timmisartut minniarnerannut ikiuutaasarpoq.

Napparut silasiutitalik kiisalu DME-talik aamma napparneqarsimavoq. Taanna ikiorsiullugu timmisartut mikkiartorneranni mittarfiup ungasissusaanik uuttortaasarpoq. Taakkua saniatigut centerbanelys-eqassaaq.

Pissarsiffik: Kalaallit Airports

Mittarfiup miffigiuminarnera maanna 89/90 procentiusoq mittarfissaq nutaat atulerpat 95 porcent missaaniilissasoq nalilerneqarsimavoq, Kalaallit Airportsimi attaveqartarnermut akisussaasoq Mikkel Bjarnø Lund ilisimatitsivoq.

Naatsorsoriminaattoq

Pujoq aasaq manna Nuummi annertuumik ajornartorsiutaasimasoq eqqarsaatigalugu, timmisartortartut timmisartullu teknikkikkut atortut nutaat kiisalu qulliit pitsaanerusut pissutigalugit minnissaq ajornannginnerulissaaq. Ullumikkut atortorissaarutit malitsigisaannik timmisartortartut mittarfimmik takusaqarsinnaassagunik missanerlutillu aalajangissagunik mittarfik tikingajaqqaartariaqartarpaat:

- Kisitsisit naatsorsoruminaattupilussuupput, tassanimi pissutsit assigiinngitsorpassuit, soorlu timmisartup suunera, ullup qanoq ilinera, anori, sila, mittarfiup suatungaatigut mikkiartortoqarnera (tassani avannaata tungaaniit kujataataluunniit tungaaniit mikkiartortarnerit assigiinngissuteqarmata) apeqqutaasartupilussuupput, Mikkel Bjarnø Lund nassuiaavoq, nangillunilu:

- Naatsorsuisarnermili pissutsit ataasiakkaat takutipaat, ullumimut sanilliullugu miffissaq takujuminarnerulissasoq.

Timmisartut anginerit sajuppillattarnerit atorsinnaanerugaat

Anori Nuummi minnissamut sunniuteqakkajuttartoq allaavoq. Tassunga atatillugu KAIR-imit oqaatigineqarpoq, mittarfissaq nutaaq silinnerusussaasoq - ullumikkut 30 meterisut silitsigisoq 45 meterisut silissuseqalissaaq kiisalu timmisartut aamma anginerusussaallutik.

KAIR-imilli oqaatigineqarsinnaannginnerarpoq, anori qanoq sakkortutigissanersoq timmisartut mittarfimmut nutaamut missinnaassanngippata:

- Aalarulunneranik ilimasaaruteqartoqassaaq, tamatumalu saniatigut timmisartut anginerusut minnissamik taamaatitsiinnartinnani sajuppillartarnernik atuisinnaanerussapput, timmisartullu assigiinngitsut ataasiakkaat qanoq sajuppillatarnernik atuisinnaanerat naatsorsoruminaappoq, tamannalu pillugu imaaliinnarluta oqaaseqarsinnaanngilagut, Mikkel Bjarnø Lund nassuiaavoq, nangillunilu:

- Soorunami sakkortuumik anorersuartillugu missinnaaneq suli ajornassaaq. Sakkortuumimmi anorersuarnera qanoq iliuuseqarfigisinnaanngilarput.

Oqaluuserineqartarsimaqisoq

Nuummi timmisartoqarfissap nutaap inissisimaffissaa pillugu ukiorpassuarni oqallittoqartarnerani mittarfiup miffigiuminarsinnaanera sammineqarnerusarsimavoq.

Isornartorsiuisartut maanna mittarfiup qaqqap sinaaniittup tallineqarnissaa qularnartoqartittarsimavaat.

Ilaatigut Grønlandsfly atuukkallarmat pisortaanerusimasup Peter Fichip oqaatigisimavaa, timmisartorsuit Nuummut Ilulissanullu minnerpaamik sapaatip-akunneranut ataasiarlutik missinnaasannginnissaat naatsorsuutigalugu, Air Greenlandillu Kangerlussuaq atortariaqartassagaat imaluunniit Københavnimut utertariaqartassasoq.

Nuummi timmisartorsuarnut mittarfissaq nutaaq 20245-mi ukiakkut atuutilissasoq naatsorsuutigineqarpoq.