Timmisartoqarfiliornissaq: Marloriarluni suliariumannittussarsiuussereersoq suliarinnittussamik isumaqatigiissuteqartoqarpoq

Canadamiut suliffeqarfiutaat Pennecon Heavy Civil Qaqortumi timmisartoqarfissap mittarfissaanik sanaartortussanngorpoq. Isumaqatigissut atsiorneqarsimavoq, sanaartornerlu upernaamut aallartinneqassalluni.

Isumaqatigiissut akigititanut isumaqatigiissutitut pingaarnertut isumaqatigiissutigineqarpoq aammalu ilaatigut ilaatinneqarput mittarfiliorneq, terminalip sumiiffissaanni sanaartorfissagissaaneq, timmisartut aqqutaat aamma timmisartut unittarfiat, biilinut
unittarfiit nunaminertassai kiisalu Qaqortumut aqqusernut aqqutaasartussap naammassineqarnissaa.

Kalaallit Airports Domestic (KAIR) tusagassiorfinnut nalunaaruteqarluni taamatut ilisimatitsissuteqarpoq.

KAIR naapertorlugu, Canadamiut suliffeqarfiutaat suliariumannittussarsiuussinerni marluusuni tamaginni iluaqutissartaqarnerpaamik neqerooruteqarsimavoq.

Qaqortumi timmisartoqarfissaq pillugu paasissutissat:

• Mittarfik 1.500 meteri, 30 meterinik atitussuseqartoq. Mittarfiit isuini tamaginni ICAO Reference kode 3C nalunaaqutserneqartoq “non-precision approach” aamma localizers
• Teminali 2.000 m2 miss.
• Inissat: Nal.ak. ilaasut 200-t (ilaasut tikittut 100-t + aallartussat 100-t)
• Nunami suliaqarnissami annertuumi ilaatinneqassaaq qaqqaq 2 mio. m3, qaartiterneqartussaq atugassiissutigineqartussarlu. Sanaartornissamut piffissamut pilersaarut ukiut pingasut ingerlasussaavoq, aammalu mittarfissaq 2025-mi ukiaanerani atorneqalertussatut naammassissalluni.
• Apriilip 28-iani Kalaallit Airports Domestic aamma Pennecon Heavy Civil Qaqortumi innuttaasunik ataatsimiititsinissamut aggersaassapput. Suliaqarneq pisussaq mittarfissarlu pillugit ilisimatitsisoqassalluni.

Pissarsiffik: Kalaallit Airports

Timmisartoqarfiup illutassai suliariumannittussarsiuuteqqinneqassasut

- Isumaqatigiissut inissimmat nuannaarutigaarput. Maannakkut sanaartornermik suliaqarnerup aallartilluarnissaa qilanaaraarput, Kalaallit Airports Domestic-imi CEO Jens Lauridsen oqarpoq, nangillunilu:

- Pennecon sumiiffinni pisunit peqqarniitsunit allanngorarsinnaasunillu
sunnersimaneqartartuni, aamma Kalaallit Nunaanni ilisarnaataasuni, sanaartornermut suliassat annertuut sivisuumik misilittagaqarfigai. Aammalu qularutiginngilarput taakkua suliassap kivinnissaanut piukkunnarnerpaasut.

Timmisartoqarfiup illutassaanik sanaartornissaq suli inissinneqanngilaq, upernaalli ingerlanerani suliariumannittussarsiuusseqqittoqarnissaa naatsorsuutigineqarpoq, KAIR-imit oqaatigineqarpoq.

Qaqartortumi timmisartoqarfiliorniarneq, suliariumannittussarsiuussinermi neqeroorutigineqartut politikkerit aallaqqaammut missingersuusiarisimasaannut sanilliullugit akisuallaartut 2020-mi aggustip qaammataani saqqummiunneqarmalli oqallisaasimaqaaq.

Ukiakkut ataatsimiinnermi ilaannakortumik aningaasaliiffigineqartoq

Siorna ukiakkut aningaasanut inatsisissaq isumaqatiginninniutigineqarmat, Inatsisartuni politikkerit mittarfissap 1500 meteriunissaanik pilersaarut attatiinnarneqassasoq aalajangerput, tassungalu atatillugu suliassap - katillugit en milliard koruunit sinnilaarlugit akeqartussatut naatsorsuutigineqartup aningaasartassai amerlanerit immikkoortinneqarlutik.

Qaqortumi timmisartoqarfissaq ingerlatseqatigiiffik Kalaallit Airports Domestic aqqutigalugu Namminersorlutik Oqartussanit sanaartortinneqarlunilu pigineqassaaq, Nuummili Ilulissanilu timmisartoqarfissat nutaat ingerlatseqatigiiffimmi Kalaallit Airports Internationalimi inissisimassalutik. Ingerlatseqatigiiffiit pineqartut pisortaat ataasiuvoq.

Pennecon Heavy Civil-imi isumaqatigiissutip inissinneqarnera aamma nuannaarutigineqarpoq.

- Kalaallit Airportsip suliaqatiginissaa aammalu sanaartornermi misilittakkatta Kalaallit Nunaanni atornissaat qilanaaraagut. Inissisimavinni tamaginni – naalakkersuisuni inuiaqatigiinnilu, kiisalu inuussutissarsiortuni suliffeqartunilu iluatsitsilluarnissap
qulakkeernissaanut ataqqeqatigiinneq suleqatigiinnerlu ingerlatsinermut aallaavigisatsinnut
tunngavigaarput, Pennecon-ip siulersuisuini siulittaasoq Larry Puddister, KAIR-ip tusagassiorfinnut nalunaarutaa naapertorlugu oqarsimavoq.