Timmisartoqarfiliassap aningaasalersorneqarnissaanut pilersaarummik ujartuisoqartoq
Naalakkersuisut Qaqortumi timmisartoqarfiliassap qanoq akilersorneqarnissaanut siunnersuummik suli saqqummiussisimanngillat, partiimi siulittaasoq Naalakkersuisut sulillutik aallartinnissaannik kaammattuisoq oqarpoq.
Aappaagumut aningaasanut inatsisissaq pillugu ukioq manna isumaqatiginninniarnermi aprofiit annerit ilagaat, Qaqortumi 1500 meteriusumik mittarfittalimmik timmisartoqarfliornissamut en milliard koruunit sinnerlugit pissarsiniarnissaq.
Aningaasanut inatsisissatut siunnersuut tallimanngornermi aappassaaneerlugu suliarineqarmat oqallittoqaqaaq, politkkerilli aningaasarpassuit suminngaanniik pissarsiarineqarsinnaanersut pillugigt tigussaasumik siunnersuuteqarsimanngillat.
Demokraatit siulittaasuta tassunga atatillugu Naalakkersuisut timmisartoqarfiliassamut tunngatillugu sakkortuumik isornartorsiorpai:
- Eqqumiillunilu pakatsinartoq
- Aningaasaqarnermut Nunamullu Namminermut Naalakkersuisup isumaqatiginninniarnernik maannamut ingerlatsisimanera pakatsissutigaara. Suliniutit assigiinngitsut, soorlu assersuutigalugu Qaqortumi timmisartoqarfiliassap qanoq aningaasalersorneqarnissaanut partiitut sinnersuuteqaqquneqarsimavugut. Sapinngisatsinnik tassunga atatillugu iliuuseqarniarsimavugut, naalakkersuisuniilli qisuariarfigineqarsimanata, Jens-Frederik Nielsen oqallittoqarnerani oqarpoq.
Taanna isumaqarpoq, Naalakkersuisut iliuuseqartussaasut:
- Naalakkersuisunukua iliuuseqartussat. Taamaammat aamma pissusissamisuuginnassaaq, Naalakkersuisut aningaasalersuinissamut periarfissanik assigiinngitsunik saqqummiussinissaat, partiit isummerfigisinnaasaannik. Tamannali pisimanngilaq, oqaatigineqareersutullu tamanna eqqumiillunilu pakatsinarpoq, taanna oqarpoq.
- Piumasaqaateqarneq naapertuuttuusoq
Naalakkersuisoq Asii Chemnitz Narup Jens-Frederik Nielsenp isornartorsiuinera akerlilerpaa. Ilaatigut oqaatigalugu timmisartoqarfiliassat pillugit suliaq tamakkiisumik takusinnaaniarlugu ammasumillu ingerlassinnaaniarlugu Naalakkersuisut suliaqarsimaqisut.
- Isumaqatiginninniarerni partiit kissaatimik qanoq aningaasalersorneqarsinnaanerat pillugu siunnersuutiminnik eqqarsaasersuutiminnillu saqqummiussinissaat pingaartissimavara.
- Isumaqarpunga partiit tamatumunnga atatillugu eqqarsaasersuuteqarnissaannik piumasaqaateqarneq naapertuuttuusoq. Soorunami imanngilaq naalakkesuisoqarfik uangaluunniit ilaatigut Qaqortumi timmisartoqarfiliassap qanoq aningaasalersorneqarsinnaaneranik eqqarsaasersorsimanngitsugut. Imaanngilarmi partiit aningaasartuutaasussanik siunnersuuteqarpata, naalakkersuisut siunnersuutit qanoq aningaasalersorneqarnissaannik paasiniassassasut, Asii Chemnitz Narup Sermitisaq.AG-mut allakkatigut akissuteqarluni itisiliivoq.
Naalakkersuisup naatsorsuutigaa, aningaasanut inatsisissap isumaqatiginninniutigineqarnerata sapaatip akunnerani matumani ingerlaqqinnissaa.