Timmisartoqarfiit pillugit saqqummersitsinermi Nunarput soqutigineqartoq

Kalaallit Airports Visit Greenlandilu timmisartoqarfissat takornariaqarnerullu iluani periarfissat nutaat pilerisaarutiginiarlugit Italiamiittumi Milanomi Routesip ataatsimeersuartitsineranut peqataasimapput.

Kalaallit Nunaanni timmisartunut atlantikukkoortaatinut mittarfissat takornariat Kalaallit Nunaannukarnissaannut ajornannginnerulersitsissapput, nunallu tamalaat timmisartuutileqatigiiffiisa, timmisartoqarfiisa timmisartoqarfinnillu ineriartortitsisuisa sinniisaat Italiami Milanomi 'Routes' ataatsimersuartitsinerani Kalaallit Nunaat takornariarfissaqqissutut saqqummiussiffigineqarput.

Ataatsimeersuarnermi timmisartunut atlantikukkoortaatinut mittarfissat pillugit tigussaasumik isumaqatigiissuteqartoqanngikkaluartoq, Kalaallit Airportsimit Visit Greenlandimillu nalilerneqarpoq, peqataaneq Kalaallit Nunaannut iluaqutaasimasoq.

Soqutiginnilluartoqartoq

- Kalaallit Nunaat takornariarfissatut soqutigineqarluarsimavoq. Assorujuk soqutigineqarsimavoq. Taannaannarluunniit eqqarsaatigalugu angalaneq angusaqarfiulluarsimavoq. Eqqumaffigineqaqaaq, Visit Greenlandimi pisortaaneq Hjörtur Smárason oqarpoq.

-Eqqumaffigineqarluaqaagut, tamannalumi soorunami atorluassavarput, taanna oqarpoq.

Kalaallit Airportsip ataatsimeersuarneq isumaqatigiissusiornissamut attaveqaatillu siunissami Kalaallit Nunaanni timmisartoqarfinnik atuisinnaasut aqqutissiornerannut atorsimavaa. Ilulissani Nuummilu timmisartoqarfissat 2024-mi atorneqalernissaat naatsorsuutigineqarpoq.

- Timmisartoqarfissat Kalaallillu Nunaata takornariarfissatut qanoq periarfissaqartitsineri pillugit soqutiginnitsitsiniaalluni sulineq ingerlaleruttorpoq. Timmisartoqarfissat marluk sananerisa saniatigut, sullitassat nutaat pilerilersinniarlugit suliaqarnerput uagutsinnut pingaaruteqarpoq, tassa timmisartoqarfissat suliarineqarneri naammassippata atuisussat amerlanerulersinniarlugit. Suliaq piffissami sivisuumi ingerlasussaavoq, matummili ilaat ammarneqartussaammata, Kalaallit Airportsimi pisortaaneq Jens Lauridsen tusagassiorfinnut nalunaaruteqarnermi oqarpoq.

Takornariarusuttut pilerisutsinneqalissasut

Timmisartoqarfissat 2024-mi suliaralugit naammassineqarpata taakkunannga atuisinnaasut pilerisutsilerniarlugit, Kalaallit Nunaat takornariarfissaqqittutut nunanut allanut pilerisaarutigineqassaaq.

Kalaallit Nunaannut ukiumut takornariartartut 100.000-it missaanniittarput. Visit Greenlandip ataatsimeersuarneq Route atorlugu, Kalaallit Nunaata misigisassarsiorfissaqqinnera erseqqissaatigisimavaa.

- Kalaallit Nunaat takornarianut asseqanngitsunik misigisassarsiorfissarpassuaqarpoq, takornariallu amerlanerutikkusuppavut, taamaammat nalunaarut ilisimasallu ullumimut sanilliullugu siammarterneqarnerussapput. Peqatigitillugu akisussaaffipput annertuserusullugulu takornariartartut amerlanerulersikkusuppavut, taamaammat tamatuminngarpiaq ikiuussinnaasunik aamma suleqatissarsiussaagut, Visit Greenlandimi pisortaaneq Hjörtur Smárason oqarpoq.

- Kinaluunniimmi timmisartoqarfimmik takunnikkiartorni tikinnavianngilaq. Inuit tikittarput Kalaallit Nunaat misigisaqarfigerusullugu. Timmisartoqarfiit amerlanerusunut atortikkusukkutsigit, Kalaallit Nunaat takornariarfissaqqissutut pilerisaarutigissavarput. Taamaammat tamanna suliariniarlugu Visit Greenland Kalaallit Airportsilu qanimut suleqatigiipput, Jens Lauridsen oqarpoq.

Powered by Labrador CMS