Timmisartoqarfiit nutaat ingerlatseqatigiiffimmut miliuunerpassuarnik annaasaqaataassasut
Mittarfinnik ingerlatseqatigiiffik Mittarfeqarfiit, Nuummi Ilulissanilu timmisartoqarfiit nutaat Kalaallit Airportsimut tunniunneqarlutillu atorneqalerpata ukiumut 44 millioner koruunit missaannik annaasaqartarnissaat naatsorsuutigineqartoq, naatsorsuisimanerit takutippaat.
Ilulissani Nuummilu timmisartoqarfissat nutaat pilersaarutit malillugit 2024-mi ammarneqarpata, Mittarfeqarfiit nunami maani timmisartoqarfinnik qulimiguulinnullu mittarfinnik ingerlatsisut aningaasaqarnerannut annertuumik sunniuteqassapput.
Kangerlussuarmiimmi Kangerlussuarmullu ilaasut amerlassusaat ikinnerpaaffianiilernissaat naatsorsuutigineqarpoq, peqatigitillugulu Nuummi Ilulissanilu timmisartoqarfinnik ingerlatsineq taakkunanngalu isertitarineqartartut Kalaallit Airportsimut nuunneqartussaapput.
Namminersorlutik Oqartussat nalilersimavaat, Mittarfeqarfiit ukiuni aggersuni ingerlatsinerminni ukiumut timmisartoqarfinnit pingasuusunit agguaqatigiissillugu 44,25 millioner koruuninik aningaasartuuteqartassasut. Aningaasat matussuserniarlugit akitsuusiinissaq aaqqiissutaasinnaavoq.
Tamanna inatsisissatut siunnersuummi nutaami Naalakkersuisut tusarniaassutigalugu nassiussimasaanni atuarneqarsinnaavoq. Inatsisissatut siunnersuummi Mittarfeqarfiit siunissaat eqqarsaatigineqarsimavoq, tassani siunnersuutigineqarluni, Mittarfeqarfiit Kalaallit Airports Holdingip ataani immikkoortortaqarfinngussasut.
Suliat amigartooruteqarluni ingerlanneqartartut kisinngorutissasut
Mittarfeqarfiit miliuunerpassuit annersaat ullumikkut nunami maani timmisartoqarfiit allat qulimiguulinnut miitarfiit ingerlanneqarnerinut atortarpaat. Timmisartoqarfiit qulimiguulinnullu mittarfiit angallaffiuvallaartannginnamik amigartooruteqarfiusarput, 2024-llu kingorna Mittarfeqarfinni suliat amigartooruteqarluni ingerlanneqartartut kisinngorutissallutik.
Mittarfeqarfiillu Kalaallit Airports Holdingimut immikkoortortaqarfinngoraluarpataluunniit, ingerlatseqatigiiffik aningaasaqarnikkut ajortumik inissisimassaaq.
Attaveqaasersuutinut naalakkersuisuusimasoq Naaja Nathanielsen siorna aassakkut oqarpoq, Mittarfeqarfiit aningaasaqarnerannut aaqqiissutissarsiortoqarnissaa pingaaruteqartoq. Namminersorlutik Oqartussat Kalaallit Airports Internationalimit iluanaarutitik Mittarfeqarfinnut nuussinnaavaat. Taamaaliortoqassappalli Kalaallit Airportsimi aningaasaqarnerup qanoq inissisimanera apeqqutaassaaq.
Aamma Namminersorlutik Oqartussat Mittarfeqarfiit kiffartuussinissamut isumaqatigiissusiorfigalugit tapersersinnaavaat, ingerlatseqatigiiffik taamaalilluni timmisartoqarfinnik qulimiguulinnullu mittarfinnik amigartoorutaasartunik ingerlatsinissamut tapiiffigineqarsinnaavoq.
Akitsuutit aaqqiissutit ilagisinnaagaat
Inatsisissatut siunnersuummut nassuiaammi ilisimatitsissutigineqarpoq, Mittarfeqarfinnut aningaasatigut tapiissutissaq qanoq annertutigissanersut paasiniarlugu suli sulisoqartoq. Politikkerilli aningaasat suminngaanniit pissarsiarisinnaanerlugit paasitinneqarsimapput, naatsorsuisimanermi naapertorlugu Nunatta Karsia, timmisartoqarfiit nutaat atorneqalerpata aningaasarpassuarnik sipaaruteqartussaavoq.
- Tassani pineqartut tassaasinnaapput, pisortat angalatitsinerisa pitsanngorsarneqarnissaat aammalu kiffartuussinermut isumaqatigiissutinut sipaagaqarnissaq. Pitsanngorsaanerit taakku taamaallaat ukiuni tulliuttuni pisortat missingersuutaanni ersitsinneqarunik atugassanngortinneqarunillu pitsaasumik iluaqutaasinnaapput. Taamatuttaaq Kalaallit Airports International A/S-ip sinneqartoorutaasa pingajorarterutaat marluk Nunap Karsianut iluaqutaaginnarsinnaapput, piginnittuni Kalaallit Airports International A/S-imi sinneqartoorutit piginnittunut iluanaarutissanngortinneqarnissaannik aalajangiisinnaappata, nassuiaammi allassimavoq.
Tamatuma saniatigut aamma oqaatigineqarpoq, timmisartumut ilaasut tamarmik akitsuummut akiliuteqartinneqarsinnaasut:
- Tassunga tunngatillugu 2025 aallarnerfigalugu attaveqaasersuutinut akiliutinik nammaqatigiiffiusunik, Nunap Karsianut akitsuutitut ilusilikkanik atuutsitsisoqalersinnaavoq, taakkulu Mittarfeqarfinnut kiffartuussinermut isumaqatigiissutissani nutaani timmisartunik angalasunut tamanut nammaqatigiiffiusumik akiligassanngortinneqarsinnaapput. Taamatut iliuuseqarnissamut mittarfiit nutaat atulernissaasa tungaanut aningaasaqarnermi missingersuusiat sukumiisumik uppernarsarneqarnissaat apeqqutaasussaavoq, inatsisissatut siunnersuummut nassuiaammi allassimavoq.
Ataatsimut isigalugit sinneqartooruteqartitsisinnaasut
Namminersorlutik Oqartussat ataani pineqartumik naatsorsuisimapput, tassani inerniliunneqarsimavoq, Mittarfeqarfinnut ukiumut tapiissutaasartut 70 millioner koruunit missaanniittut ilaat silaannakkut angallassinerup pisariinnerulersinneqarneratigut pissarsiarineqarsinnaasut. Tamatuma saniatigut Kalaallit Airports International Nuummi Ilulissanilu timmisartoqarfinnik ingerlatsisussaq sinneqartooruteqartassasoq naatsorsuutigineqarpoq.
