ajutoorneq
Timmisartoq sooq ajutoornersoq pissanngatigineqarpoq
Timmisartup Dash 8-p Ilulissani sapaatip akunnera kingulleq ajutoornera ajutoortoqarsimatillugu misissuisartut misissoreermassuk Danmarkimut uterput
Ilulissani timmisartup minnerani ajutoortup misissorneqarnera ajutoortoqartillugu misissuisartut sapaatip akunnerata tulliani nalunaarusiaagallartumik saqqummiussissapput. Nalunaarusialli inernivia kingusinnerusukkut saqqummiunneqarumaarpoq. Timmisartup minnermini ajutoorpoq pingasungornermi januaarip 29-ani nalunaaqutaq 08.45-p missaani.
Timmisartumi ilaasuni annertunerusumik ajoqqusertoqanngilaq, sisamalli annertunerusumik ajoqqusinngikkaluartut napparsimaviliaanneqarlutik.
Timmisartuliortut utaqqisut
Ajutoortoqarsimatillugu misissuisartut Ilulissanit Danmarkimut uteqqammerput. Danmarkimi misissuineq ingerlaqqissaaq.
- Ilulissani timmisartumik ajutoortoqarnera pissutaalluni nunarsuaq tamakkerlugu malinnaavoq. Nunarsuarmi timmisartut Dash 8-tat amerlasuut atorneqarput, timmisartuliortarfiillu pissangassutigaat sooq timmisartoq Ilulissani minnermini ajutoorsimanersoq, ajutoortoqarsimatillugu misissuisartuni pisortaq Kurt Færk Madsen Sermitsiaq.AG-mut oqarpoq.
Ajutoortoqarsimatillugu misissuisartut Air Greenland timmisartumillu Dash 8-mik sanasut attaveqarfigiinnavittassavaat.
Silarluttumi angalaneq
- Anorlernerani angalasoqarsimanera aalajangiiffigiumaarparput qanoq pitsaanerusumik iliortoqarsimasinnaanersoq. Air Greenland timmisartuliorfillu nalunaarusiornermi annertuumik qanoq pitsaanerusumik iliortoqarsimasinnaanera sammineqangaatsiassaaq, Kurt Færk Madsen Ilulissani ajutoortoqarneranik misissueqataasoq oqarpoq.
Atortorissaarut timmisartumi susoqarsimaneranik nalunaarusiortartoq timmisartup iluani inissinneqartartoq ajutoortoqarsimatillugu misissuisartut misissussavaat.
- Timmisartumi aquttut qanoq pikkoritsiginersut atortorissaarummi takusinnaavarput, silap pissusaa kiisalu timmisartup milernerani susoqarsimanersoq paasissutissani takusinnaallutigu, Kurt Færk Madsen oqarpoq.
Ajutoortoqarsimatillugu missuisartut nalunaarusiaagallartumik suliaqassapput, tassani timmisartumi susoqaqqissaartoqarsimanersoq nalunaarusiami suliarineqassalluni. Paasineqareepoq timmisartup meriitsiarnerani ajutoorneq pisimasoq.
- Inaarutaasumik nalunaarusiornissaq piffissami suli ungasinnerusumiippoq, tassani sooq timmisartup ajutoorneranut pissutaanersut saqqummiunneqarumaarput, Kurt Færk Madsen oqarpoq.
Januaarip 29-ani timmisartup minnerani minutsimut 16 meterinik sakkortutigisumik Ilulissat anorlerpoq.