Timmisartoq nutaaq Airbus akiata affaa sinningaatsiarlugu akikinnerusumik pisiarineqarsimasoq
Air Greenland Norsap taartissaanik – Airbus A330-800neo – 750 millioner koruunit sinnerlugit akikinnerusumik akilerlugu pisiaqarsimannguatsiarpoq
Ingerlatseqatigiiffiup qanorpiaq akiliisimanini oqaatigerusunngilaa, ilisimatitsissutigaluguli danskit koruuniinik millioninik pingasunik kisitsisitalimmik akilerlugu pisiarineqarsimasoq. Timmisartoq 1,75 milliarder koruuninik naleqartoq affangajaa akilerlugu pisiarineqarsimavoq, timmisartorneq pillugu atuagassiaq check-in.dk allappoq.
Pisortaanerup Jacob Nitter Sørensenip ilisimatitsissutigaa, akia naggataatigut aalajangiisuusimasoq, tassani Boeings 787-8 Dreamliner akisuallaarsimagami toqqarneqarsimanngilaq.
- Dreamliner unammillerluarsinnaagaluarpoq timmisartutsialaallunilu. Timmisartut taakku marluk toqqaannartumik imminnut sanillersuukkaanni assigiittorujussuupput, A330-li nalunngereeratsigut tamanna aalajangiisuusimvoq, taamaalillutami timmisartortartut ilinniarteqqittariaqanngilavut, mekanikerit timmisartumut nutaamut tunngatillugu ilinniartittariaqanngilavut kiisalu kingoraartissarpassuit pigeriikkavut atorsinnaallutigit, Jacob Nitter Sørensen check-in.dk-mut nassuiaavoq.
14-iinnarnik inniminniisoqasimasoq
Airbus taanna immikkut ittoq timmisartuni Airbusiusuni pilerigineqannginneruvoq. Maannamummi 14-iinnaat inniminnerneqarsimapput, taassumali tulli A330-900neo 323-nit inniminnerneqarsimalluni, timmisartorneq pillugu atuagassiaq allappoq.
Jacob Nitter Sørensenip timmisartoq taamaalluni tuniniarneqassagaluarpat akissaata ajornartorsiutitaqarsinnaanera ernumassutiginngilaa.
- Tamanna siulersuisuni oqaluuserisareerparput. Tuniniaqqinneqassagaluarpat akissaa ernumassutiginngilara, timmisartuummi atuuffiusinnaanera eqqarsaatigalugu timmisartunik taarsersuisoqarfiunerani timmisartoq pissarsiaringatsigu, Jacob Nitter Sørensen erseqqissaavo1.
Timmisartoq nutaaq aappaagu ukioq naalerpat tunniunneqassaaq.