Paamiut
Timmisartoq motoorimigut ajoquteqarluni qularnaatsumik mittoq
Air Greenlandip timmisartuata Cassna timmisartuaraq Paamiunut ingiortariaqarsimavaa
Joint Rescue Coordination Centre Greenland ataasinngornermi novembarip 14-anni nalunaaqataq 13.05, Nuummi Naviairs Flight Information Centerimit nalunaarfigineqarpoq, timmisartoq Cessna sisamanik issimasulik ajornartoorluni nalunaaruteqarsimasoq.
Motoori qamittoq
Timmisartoq Cessna Canadami Goose Bayimit Narsarsuarmut ingerlaartoq, mittarfimmit 45 minutsit timminermit ungasissuseqarluni, timmisartup motooriata marluusut aappaa uuliakuulerpoq. Kinguninngua motoori qamittiq nalunaarutigineqarpoq, timmisartorlu motoori ataasiinnaq atorlugu timmilerpoq.
Nalunaartoqarnera pissutigalugu Joint Rescue Coordination Centre Greenlandip Narsarsuarmi upalungaarsimasut kalerrisaarpai, timmisartoq tikinnissaanut piareersimaniassammata. Tamatuma saniatigut umiarsuaq alapernaarsuut Ejnar Mikkelsen aamma Air Greenlandip qulimiguuliutai upalungaarsimasut Bell 212 aamma S-61 kalerrisaarneqarput.
Joint Rescue Coordination Centre Halifax Canadamiittoq aamma attaveqarfigineqarpoq, tamatuma kingorna taakkut timmisartumik assartuisartumik C-130-imik Cessnap sumiiffiata tungaanut aallartitsipput.
Sumiissusersiuteqanngitsut
Air Greenlandip timmisartua Dash-8 Narsarsuarmut ingerlaaraluarpoq, kisianni sumiiffimmi silarlunnera pissutigalugu Narsarsuup qulaani silaannarmiipput. Akunnerup affaa qaangiuttoq timmisartumit Cessnamit nalunaaruteqartoqaqqippoq. Maanna timmisartup sumiissusersiutaa ajortissimavoq. Taamaattumi timmisartortartup radio aamma aquttarfimmit isigisani sumiissusersiutigilerpai.
Ersernerluttoq
Narsarsarsuarmili silap erseqqarissusaa ajorluinnarmat, mittarfimmut minnissaq illersorneqarsinnaanngitsoq, timmisartumi Dash-8-mi timmisartortartup nalunaarutigaa. Taamaammat timmisartoq Cessna Paamiunut ingerlaqquneqarpoq.
Cessna Paamiunut timminermini Air Greenlandip timmisartuanit Dash-8-mit ingiaqatigineqarpoq, taamaalillunilu minnissaata tungaanut sumiissusiorsiorneranik ikiorpaa.
Nalunaaqutaq 15.00 qaangilaaraa Joint Rescue Coodination Centre Greenland nalunaarfigineqarpoq, timmisartoq Cessna Paamiunut qularnaatsumik missimasoq.