Timmisartoq Airbus suli alla Air Greenlandip kissaataaniittoq
Air Greenland timmisartumik Airbusimik suli allamik pisisinnaavoq, taannali Norsamut taartaasussamit mikineruvoq
Nutarterneqartoq nal. 12.12. Jacob Nitter Sørensenip oqaaseqaataanik erseqqissaataanillu ilallugu, aaqq.
Air Greenland Ilulissani Nuummilu mittarfissuit nutaat 2023-mi piareerpata timmisartortitseqatigiiffinnit allanit unammillerneqalernissaq timmisartunillu ingerlaarfiit nutaat ineriartortinnissaannut periarfissat piareersimaffigiumallugit timmisartumik Airbusimik suli allamik pisisariaqalersinnaasoq, timmisartuussineq pillugu atuagassiaq check-in.dk qulaarivoq.
Pisortaaneq Jacob Nitter Sørensen atuagassiamut paasissutissiilluni oqarpoq, timmisartumik immikkut ittumik pisinissaq suli inaarutaasumik aalajangiivigineqarsimanngitsoq, kisianni tamanna piviusunngussagaluarpat timmisartup qanoq ittuunissaa timmisartuliorfiullu sorliunissaa timmisartuutileqatigiiffimmit qularutigineqanngitsoq.
Jacob Nitter Sørensen Sermitsiaq.AG-mut erseqqissaalluni oqarpoq, “timmisartumik Airbusimik suli allamik immikkut pisinissamik suli tigussaasunik pilersaaruteqanngilagut, kisianni tamanna soorunami periarfissaasinnaavoq, siunissami oqaluuserisassarput”.
Timmisartortartunik tamakkiisumik atorluaaneq
- Taama pisoqassappat taanna A320-seriemeersuussaaq, Jacob Nitter Sørensen atuagassiamut oqarpoq innersuussutigalugulu, timmisartuni A320-ni aamma A330-ni timmisartortartut timmisartut assigiinngitsut marluk sivikitsumik sungiusareernermikkut ingerlassinnaagaat, taamaalillunilu timmisartortartuutigineqartut tamakkiisumik atorluarneqarsinnaasut.
Timmisartup immikkut allap Air Greenland aamma periarfississavaa Københavnip Qaqortumilu nunap immikkoortuani mittarfissap akornanni ingerlaarfiup aasaanerani nammineq isumaginissaanut. Suliassaq tamanna 30-riarluni timmisartuussinertalik ukiuni kingullerni Jet Timemut isumagisassanngortillugu suliassiissutigineqarsimavoq.
Unammilleqatigiinneq nutaaq
Mittarfiit nutaat aqqutigalugit nunarsuarmi timmisartuutileqatigiiffinnit allanit unammillerneqarnerulernissaq ammaanneqassaaq. Tamanna eqqarsaatigalugu timmisartumik Airbusimik suli allamik pigisaqalernerup kinguneranik Air Greenlandip niuerfittut ingerlatani, ullumikkullu inissisimaffigilluakkani illersorsinnaanerussavaa.
- SAS timmisartuutileqatigiiffiilluunniit allat niuerfinni pilerinassuseqarluartuni timmisartuussilersarput. Niuerfik ullumikkut annikitsuinnaavoq, kisianni (mittarfissuit nutaat ammarneqarnerisa kingorna, aaqq). ukiut aappassaanni, pingajussaanni sisamassaanniluunniit unammillertoqalersinnaavoq, Jacob Nitter Sørensen check-in.dk-mut oqarpoq.