Isortoq
Timmiaaraq oqaluffimmiittoq: Eqqoqqortuujuvorooq
Timmiaaraq Isortumi oqaluffimmi pulaartoq tunup kujataani takussaasareerpoq
Pinngortitaleriffimmi ilisimatuup Lars Vittingip ilimagilluinnarpaa timmiaaraq Isortup oqaluffianut sapaammi ullaakkut iseraluartoq tassaasoq eqqoqqortooq. Taanna Danmarkimi takussaalluartarpoq aammalu aasaanerani tunup kujataani aamma siumugassaasarluni.
Atuaruk: Timmiaaraq ilisimaneqanngitsoq Tasiilap eqqaani siumorpaat
Isortormiut nalornissutigilerarluarpaat timmiaaraq sapaammi ullaakkut oqaluffimmut iseraluartoq timmiaq sunarpiaanersoq. Timmiaaqqap assiga Sermitsiaq.AG-p pinngortitalerivimmut ingerlateqqippaa. Taakku qularinngilaat tassaasoq qupaloraarsuit ilaat eqqoqqortooq 18 centimeteri angullugu angissuseqalersinnaasoq. Taanna aamma tunup kujataani manniliortarpoq.
Eqqoqqortooq taanna sapaammi ullaakkut Isortup oqaluffia silaannarissarneqartoq oqaluffimmut iserpoq. Qulinulli naalagissat sioqqullugit anisinneqarpoq immallu tungaanut aanngaannarluni.