Isortoq

Timmiaaraq ilisimaneqanngitsoq Tasiilap eqqaani siumorpaat

Isortumi Tasiilap eqqaaniittumi oqaluffik sapaammi immikkuullarissumik pulaartoqarpoq

Timmiaaraq oqaluffimmi alapernaasereerluni anigami imaanut sammivilimmik timmilluni aanngarpoq

Isortormiut oqaluffimmi timmiaararpalaamik tusaasaqalermata alutorsaatigineqarpoq. Sapaatip ullaavani oqaluffik silaannarissarneqarmat timmiaaqqamik sumiiffimmi tassani takornarneqartumik isertoqarpoq. Matu qiviinnarsimasoq atorlugu timmiaaraq isersinnarluni pulaarsimavoq.

Sapaammi ullaakkut Isortumi oqaluffik kiassimavoq. Taamaammat oqaluffimmi ikiortaatsup matorsuit ammarlugit silaannarissarsimavoq. Ilimagineqarporlu taanna aqqutigalugu timmiaaraq taanna isersimassasoq.

- Timmiaaraq taama ittoq siornatigut takusimanngilarput. Taartuuvoq qungatsimigut qaqortoq. Qupaloraarsuit angeqqaatigikannerpaai taamaattoq timmiaaqqat allat maanga aasami tikittartut assiginngilai, Isortumi atuarfimmi pisortaq ajoqiusorlu Ina Enoksen Sermitsiaq.AG-mut oqarpoq.

Taanna oqaluffimmi ikiortimit sapaammi ullaakkut kalerrinneqarpoq takusaangasuarlunilu.

- Mianersorluinnarlunga oqaluffimmut iseriartorpunga timmiaaraq qimaatinniannginnermut. Timmiaaraq assilerusukkaluarpara, ersarivissumilli assilinissaa iluatsinnagu. Oqaluffimmi inersuarmippoq timmilluni noqqattaarluni ilaatigut alterip qulaaniittarluni, Ina Enoksen oqarpoq.

Quliniilli naalagiartoqartussaammat timmiaaraq oqaluffimmit anisinniarneqarpoq. Igalaat arlallit matorsuillu ammarneqarput. Taamaasimmat timmiaaraq anivoq imaatalu tungaanut aanngarluni.

Sermitsiaq.AGp Pinngortitaleriffik suleqatigalugu maanna misissorpaa timmiaq pineqartoq sunarpiaanersoq.

Powered by Labrador CMS