Timikkut tarnikkullu persuttaasarneq atorunnaarsissavarput: Kommuni angutinut pikkorissartitsissaaq

Kommune Kujalleq angutinut Narsami, Nanortalimmi aamma Qaqortumi pikkorissartitsissaaq. Timikkut tarnikkullu persuttaasarnerup annikillisinnissaa pitsaaliuinissarlu siunertarineqarput.

Psykoterapeut aamma inunnik isumaginnittoq Anda Poulsen pikkorissartitsissaaq.

Angutinut pikkorissartitsineq.

Psykoterapeut aamma inunnik isumaginnittoq Anda Poulsen februaarimi pikkorissartitsissaaq. Anda Poulsen ukiorpaalunni Nuummi angutit oqaloqatigiittarfiannik ingerlatsisarpoq, angutit tassani eqqarsaatiminnik misigissutsiminnillu eqqartueqatigiissinnaapput.

Kommune Kujallermi pikkorissaanerni assigiinngitsut sammineqassapput, ilaatigut perorsaaneq, angutitut inissisimaffik, ataatatut inissisimaneq akisussaaffeqarneq, misigissutsillu assigiinngitsut suut nalaanneqartartut pillugit, kommuni ilisimatitsivoq.

Pikkorissartitsineq ukunani ingerlanneqassaaq:

Narsaq: Ataasinngorneq 6. februar pingasunngorneq 08. februar ilanngullugu.

Nanortalik: Tallimanngorneq 10. februar sapaat 12. februar ilanngullugu.

Qaqortoq: Marlunngorneq14. Februar sisamanngorneq 16. Februar ilanngullugu.

Angutit inuttut ingerlariaqqinnissamut, akisussaaffeqarnermik ajunngitsumillu iliuuseqarnissamut alloriarfittut aqqutissiorfittullu pikkorissarneqassapput. Timikkut tarnikkullu nakuusertarnerup aammalu nakuuserfigineqartarnerup pitsaaliornissaanut pikkorissarneq una alloriarfittut siullertut aqqutigineqarsinnaasuuvoq, peqataasumut iluaqutaasussaq takunnilerfiusussarlu inissisimaffiup suuneranik qanorlu ittuuneranik.

Anda Poulsenip pikkorissartullu peroriartorneq, ilaquttat, angutaaneq inuiaqatigiinnilu ineriartornermi piumasaqaatit atugarisallu sammissavaat

Kommunimi angutit isumaginninnermut pinaveersaartitsinermullu ingerlatsivimmut sianerlutik peqataanissamut nalunaarsinnaapput: 64 54 63 imaluunniit innuttaasunut sullissivimmut saaffiginnillutik. Nalunaarfissaq kingulleq 31. Januar 2023.

Powered by Labrador CMS