pilluaritsi
Timi Asimi inuusuttunut sapiitsunut allagartanik tunisivoq
Timi Asimi 2011-imili aallartimmat inuusuttut 128-t Timi Asimip aaqqissuussaanut peqataasimapput. Peqataasussat nutaat januaarimi aallartissapput
Persuarsiorpalaartumik katerisimaarnermi inuusuttut aqqanillit Timi Asimi aaqqissuussaanut peqataasimasutut uppernarsaammik tallimanngornermi tunineqarput. Ilaatigut uppernarsaatit tunniunneqartut tassaapput annaassiniarsinnaanermut ikiueqqaarnermullu pikkorissarsimanermut.
Ukiap ingerlanerani piffissap ilaatigut peqataasunut ilitsersuisunullu Timi Asimip ingerlannera pikkunartarsimavoq, inuusuttut allat aamma peqataasimammata.
Timi Asimi meeqqat angerlarsimaffiat Qaamasoq aamma Kommuneqarfik Sermersuumi inunnik isumaginnittoqarfik qanimut suleqatigilerpaat, taamaalilluni peqataasut ilaatigut meeqqat angerlarsimaffianneersuupput imaluunniit meeqqat atuarfiannit aninerminnit ingerlariaqqissimanngitsut.
Assit: Timi Asimi Knud Rasmussenimi
Assit takukkit: Inuusuttut aputinik meterinik portussusilinnik unammillertut
Taamaattorli suliniummut Timi Asimut ingerlatitsisoq isumassarsisorlu, Kim Godtfredsen, nuannaarutiginnippoq tulluusimaarutiginnillunilu inuusuttut Timi Asimip ingerlataanut peqataasimanerminnut maanna uppernarsaammik tunineqarmata.
- Eqimattat ukua ingerlanneri unamminarsimapput, ilaatigummi amerlanerit suli ilikkarsimanngilaat piffissaq eqqorlugu takkuttarnissaq, kisiannili aamma ilai ilaqutariinnit inuuniarnermikkut ajornartorsiuteqartunit imaluunniit meeqqat angerlarsimaffiannit aggerfeqaramik. Kisiannili aamma uppernarsarsinnaasimavaat inuusuttuni sullissimasatsinni sapiinnersaallutillu nukittunersaanertik. Meeraanerminni sakkortuumik atugaqarsimanertik pissutigerpiarlugu sapiitsuupput peqataanermillu nalaanni unammilligassanut ajornanngitsumik ikaarsaartarput. Soorlu assersuutigalugu Timi Asimip oqaluttuarisaanerani naluttarfimmi annaassiniarnermut misilitsinnermi peqataasut tamarmik aatsaat ataatsikkut angusipput, Kim Godtfredsen tulluusimaarluni oqarpoq.
Atuaruk: Timi Asimi ingerlaqqippoq
Inuusuttut, suliniummut peqataasimanerminnut uppernarsaammik tallimanngornermi tigusisut pikkorissarnerit uku ilaatigut aqqusaarsimavaat: ikuieqqaarneq, qatserinermut tunngaviusumik pikkorissarneq, annaassiniartartutut pikkorissarneq, nalunnermut pikkorissarneq, pisunneq, inuttut ineriartorneq, suleqatigiissinnaanermut sungiusarneq, nerisat nerisassiornerlu pillugit pikkorissarneq, innartorneq, crossfiterluni sungiusarnerit kiisalu suliffeqarfinnut pulaarnerit.
Timi Asimi 2011-imili aallartimmat inuusuttut 128-t Timi Asimip aaqqissuussaanut peqataasimapput. Peqataasussat nutaat januaarimi aallartissapput.