Timersortartuusimasoq: Unammersuaartitsisoqarsinnaavoq
Coronavirusi pissutaalluni timersornikkut unammersuaarnerit 2020-mi taamaatiinnartariaqarsimapput. Timersortartut piumassusaat attatiinnarneqassappat ukioq manna unammersuaartoqartariaqartoq, Finn Nielsen isumaqarpoq.
- Suli unammisartuusimasuuguma ukioq 2020 nuannerpallaarsimanavianngilaq.
Assammik arsartartuusimasoq arsaattartuusimasorlu Finn Nielsen Sermitsiaq.AG-mut oqarpoq.
Taamaattoq corona pillugu allatseqarfiup unammersuaarnernik taamaatitsiinnarsimanera paasisinnaalluarpaa.
- Aappaatigut unammisartut aamma paasisinnaavakka, taakku unammersuaarusukkaluarput. Unammisartutut unamminerit pisariaqarput. Aamma innuttaasut akornanni unammersuaarnerit amigaatigineqarput, unammersuaarnerimmi soqutigineqarluartarput nuannarineqarluarlutik. Taamaattumik ukioq manna unammersuaartoqarnissaa neriuutigaara, oqarpoq.
Periarfissat ujartorneqarnissaat
Allatut eqqarsarluni unammersuaarnerit aaqqissuunneqarsinnaanerat neriuutigaa.
- Unammersuaartitsinissamut periarfissaasinnaasut misissorneqartariaqarput, unittoorfigineqarsinnaasut uniffigiinnarnagit. Immikkut ittumik timersortartunut isumaqatigiissuteqartoqarsinnaavormi. Immaqa soorlu coronamut misiliinerit immikkut ittumik aaqqissuunneqarsinnaagaluarput.
- Illoqarfimmi ataatsimi kisimi unammersuaartoqartariaqanngilaq. Kommunit qanigisariit siullermik unammitinneqarsinnaapput, tassani ajugaasut naggataarutaasumik unammisinnaallutik, siunnersuivoq.
Pitsaassutsit assigiinngitsut
Nunatsinni timersullaqqinnerpaat imminnut unamminissaat pisariaqartoq isumaqarpoq.
- Kommunit ilaanni unammisartut pitsaanerpaat tullinnguuttullu imminnut nikingangaatsiarsinnaasarput, taamaattumik iliuuseqartoqartariaqarpoq. Timersornerup soqutigineqarnera annikillissanngippat ukioq manna unammersuaartitsinerit pillugit immikkut iliuuseqartoqartariaqaraluarpoq, Finn Nielsen oqarpoq.