Timersornermut Naalakkersuisup Maaji Nuan tulluussimaarutigigaa
Meeqqaniit utoqqarnut qaammammi matumani aalanerulertussaapput. Illoqarfippassuarni kommunillu tallimaasut nunaqarfiini Maaji Nuan-imut atatillugu timersornikkut sammisassaqartisinissaq aaqqissuunneqarsimavoq.
Ilaatigut Ilulissani, Sisimiuni, Aasianni Nuummi meeqqat mikisut angisuullu arpattut, utoqqaallu pisuttuaqatigiittut qaammammi matumani takuneqarsinnaapput. Ilulissani inersimasut nunanut allanut unammisartumik Ivaana Meinckemik peqateqarlutik aamma timersortinneqassapput. Timersornermut Naalakkersuisunngorlaap suliniutigineqartut tamakku tulluussimaarutigai.
- Soorunami aaqqissuussisimanerit nuannaarutigalugillu tulluussimaarutigaakka. Aaqqissuussinerit taamatut ittut pingaarutilipilussuupput, neriuutigaaralu illoqarfinnut nunaqarfinnullu tamanut taakku siammarterneqarnerussasut, Peter Olsen Sermitsiaq.AG-mut oqarpoq.
Maaji Nuan Nuummi 2007-imi aallartinneqarpoq. Morten Jørgen Heilmann taamatut aaqqissueqqaartuusimavoq.
2030-mi aalanerpaaniartut
Kalaallit Nunaanni Timersoqatigiit Kattuffianit anguniagaavoq, Kalaallit Nunaata nunarsuarmi timimik aalatitsiffiunerpaaffinngornissaa. Timersornermut Naalakkersuisunngorlaap tamanna tapersersorniarpaa, aamma naalakkersuisooqatigiinnissamut isumaqatigiissummit tamanna allassimammat.
- Kalaallit Nunaata nunuarsuarmi timimik aalatitsiffiunerpaanissaa anguniarparput. Taamaammat Maaji Nuan tamatumunnga assersuutissaalluarpoq. Taamatut ittut tapersersugassaraavut.
Peter Olsenip ilaatigut timersornerup silarsuaani nammineq kajumissutsimik suliaqartarnerup nukittorsarneqarnissaa pillugu GIF oqaloqatiginiarpaa, maannakkorpiarmi namminneq kajumissutsiminnik suliaqartartut ikiliartuinnavimmata.
- Timersorneq timimut peqqinnartuinnaanngilaq. Aamma tarnimut peqqinnartuuvoq. Nutaanik ikinngutitaartoqartarpoq, inuunerup sinnerani ilisarisimaligassanik aamma kiserliorunnaartoqartarpoq, Timersornermut Naalakkersuisoq naggasiivoq.
Sunngiffimmi klubip minip sapaatip akunnerani matumani siusinnerusukkut Nuup Qinnguani seqinnarissuarmi meeqqanut 148-nut marathonertitsinerani assit, ilanngutassiap aallartinnerani takukkit.